Unaha ang tugkaran

Si Presidente Rodrigo Duterte nipakugang sa mga Sugboanon dihang siya nisulti nga daghang mga pulis ug agents sa Philippine Drug Enforcement Agency (PDEA) nga mga adik. Apan sa gipaabot, wa molalis ang Police Regional Office (PRO) 7 sa pamahayag sa Presidente, inay ilang panghingusgan ang kampanya batok sa mga pulis nga adik.

Ang nagkasinukliay hinuon og mga pulong mao sila si Cebu City Mayor Tomas Osmeña ug Talisay City Mayor Eduardo Gullas. Kini human gihulagway ni Osmeña si Gullas nga “lousy” ug way nabuhat sa pagsumpo sa illegal drugs.

Nibawos usab si Gullas sa pag-ingon nga sa di pa molabay og lapok ngadto sa lain, hilngon una ni Osmeña ang iyang kaugalingon kon limpyo ba usab siya.

Nipasabot si Gullas nga siya mismo ang nihangyo kang PRO 7 Director Debold Sinas nga dugangan ang mga pulis. Sobra pa sa iyang hangyo ang gipadala nga mga pulis, 42 ang gidugang ug maoy gipabantay sa Barangay Tangke.

Sukad gibantayan ang Tangke, kapin na sa 40 ka mga tawo ang nangadakpan kay user o pusher sa illegal drugs.

Ang Talisay City di kabahin sa teritoryo ni Osmeña kay Cebu City ra ang iyaha. Unsa may iyang katungod sa pagpanaway kang Gullas? Ang angay unta motawag sa atensyon ni Gullas mao si Gobernador Hilario Davide III.

Usa pa sab, wa bay bersyon ang siyudad nga sama sa Tangke? Unsa na lang diay ang mga barangay Ermita, Pasil. Suba, Duljo ug uban pa nga nailhan na kaayong naghitak ang illegal drugs?

Busa, sakto si Gullas sa pag-ingon nga tan-awon una ni Osmeña ang iyang kaugalingon una siya manaway sa lain. Manilhig una siya sa iyang kaugalingon nga tugkaran una siya mamantay sa uban.

Limpyuhan una ni Osmeña ang mga dapit sa Cebu City nga gilubloban sa mga durugista una siya manaway sa Talisay.