Makalibog nga baruganan
Abi ba nako og ang “kanhi laos nga pulitiko” dakong supak sa serye sa mga pagpamatay dinhi sa dakbayan sa Sugbo nga binuhatan sa mga hired killers ug government agents. Iyang gitumbok ang kapulisan mga maoy nagpaluyo niining mga pagpamatay gumikan sa pipila ka mga sirkumstansiya. Una, ang pagsuway sa pag-ambush ni Tejero barangay councilor Jingjing Cadungog diin ang gidudahan nga suspek mao si anhing PO3 Eugene Calumba. Apan na-unhan lang si Calumba sa driver-bodyguard ni Cadungog nga si William Macaslang ug napusilan patay.
Ikaduha, mao ang pag-ambush patay ni Philippine Drug Enforcement Agency (PDEA) agent Von Rian Tecson nga diin ang usa sa mga gidudahang suspek mao si SPO1 Roderick Balili diin nabawsan ni Tecson ug napatay. Apan ang kadagkuan sa kapulisan mihimakak niini ug niinsister nga na-unay si Balili sa iyang armas gumikan sa accidental iring. Pero morag dili katuhuan ang version sa kapulisan. Kini base sa mga pamahayag sa mga saksi ug kutay sa mga circumstantial evidences.
Human mi-anunsyo si Presidente Rodrigo Duterte nga mohatag siya og P5 million sa makapatay og ‘ninja cop’ o salawayon ug badlungon nga pulis, ang “kanhi laos nga pulitiko” mitanyag usab og P50,000 nga dugang ngaincentive. Abi ba nako og dako siyang supak aning mga pagpamatay. Pinaagi sa pagtanyag ning maong kantidad, iya naman hinuon nga gi-encourage ang mga kasong pagpamatay ug nag-promote og bayolente nga paagi.
Pasagdi na lang si Duterte kay mao gyud ni ang iyang baruganan karon nunot niining iyang hugot nga kampaniya batok sa illegal nga drugas. Daghan na ang mga nangamatay bisan gani ang mga ahente sa kagamhanan labi pa mga pulis. So, ang mahitabo niini nga mag-unay na lang ang atong mga awtoridad. Bad cops batok good cops.
Aber, unsa may iyang criteria sa badlungon nga pulis? Kanang naa sa iyang listahan? O depende lang kon kinsa makahong-hong niya? Dilikado baya ni. Gi-validate o gi-check gyud kaha ang background niining maong mga pulis kon tinuod ba silang nahilambigit gyud sa dautan. Ug kon pananglitan ang iyang mga higala o sinaligan nga mga pulis ang ma-igo, mohatag usab kaha siya sa nakapatay?