Balati-an ni Duterte
Dili ikalimud nga adunay gihambin nga balatian si Presidente Rodrigo Duterte. Iya na kining giangkon ug gipahibawo sa publiko sukad pa niadtong presidential election campaign.
Sumala sa Presidente nga naghambin siya og mga balati-an apan wala siyay cancer ug ubang grabeng sakit. Iyang gipahibawo nga anaa siyay migraine nga mo-atake kaniya kanunay. Anaa usab siyay slipped disc tungod sa iyang pagka-aksidente sa motorsiklo kapin sa 10 ka tuig nang nakalabay. Nag-antus usab siya niining Barrett’s esophagus ug Buerger’s disease nga resulta sa iyang pagka-hinabako. Kining maong mga sakit dili life-threatening kun dili makamatay. Miinsister hinuon siya nga dili niya i-release ang iyang medical record.
Nahisgutan kini pag-usab tungod sa pasangil ni Communist Party of the Philippines founder Jose Maria Sison nga nag-coma kuno si Pres. Duterte niadtong miaging weekend. Apan nagkapuliki og pangatarungan si Sison sa dihang dakung buhi si Duterte nga namulong atubangan sa mga mayor atol sa League of Municipalities of the Philippines Visayas Island Cluster Conference sa Radisson Blu Hotel dinhi sa Cebu City niadtong Martes sa gabii.
Daghang mga kaatbang ni Duterte gusto nga ipahibawo ang tinuod niyang sakit pinaagi sa pagyagyag sa iyang medical record. Sumala sa tipik sa atong Constitution, Article VII, Section 12: In case of serious illness of the president, the public should be informed of the state of his health. Ang akong gikahadlukan nga mamatay si Pres. Duterte dili sa sakit kon dili sa assassination sa mga tawo o kaha mga nasud nga nanuyo kaniya.
Wala pa gayud makit-i si Peter Go Lim. Sumala sa kapulisan nga wala na siya dinhi sa Sugbo ug tua na siya nagtago sa Metro Manila. Apan daku og posibilidad nga mibiya na siya sa Pilipinas og tua na sa nasud nga walay extradition treaty ang Pilipinas aron dili siya dakpon ug papaulion dinhi sa nasud. Posible kining tanan sa tawong anaay daghang salapi. Ambut og nganong wala man bantayi sa mga tinugyanan sa balaud ang mga kalihukan ni Lim samtang giimbistigar pa siya sa Department of Justice. Sayon na lang unta kaayo ang pagpusas sa maong negosyante.
Gibutyag ni Presidente Duterte nga daghang mga sakop sa Philippine National Police (PNP) ug sa Philippine Drug Ednforcement Agency (PDEA) dinhi sa Sugbo nga mga adik. Nag-apil kuno kini sa mga heneral ug ubang dagku og ranggo nga mga opisyal. Maka-uuwaw kini. Unsa may nawong nga i-atubang sa mga pulis ug PDEA sa mga drug addicts ug druglords nga ilang dakpon nga mao man usab diay ilang bisyo. Kinahanglang mohimo og lakang ang PNP ug PDEA aron pagmatuod nga wala malambigit sa iligal nga drugas ang kadaghanan kanila sigun sa pasangil sa presidente.