Mobisita gyud sa Cebu ang KathNiel

Daghan intawn ang nabaraw nga mga plano nga maglulinghayaw niadtong niaging Martes ug, unta, Miyerkules. Unsaon nga nagtoo man ang kadaghanan nga pista opisyal ang duha ka adlaw tungod sa pagsaulog sa Ninoy Aquino Day (Agosto 21) ug Eid’l Adha (Agosto 22).

Karon kay ang mga awtoridad sa pagtoong Muslim niingon man nga sa petsa 21 ang angay nga panahon sa pagsaulog, mao nga bale duha ka kasaulogan ang nahitabo niadtong Martes.

Babayu ang mga plano. Pero sa Lunes kay bakasyon na man sab, mamawi ta. Magki-at ta to da maks sa long weekend.

○○○

Sa akong lindog sa igsoon (o inahan?) ning inyong paboritong Super B nga mao ang Sun.Star Cebu, akong gipahayag nga may kahigayonan nga mobisita sa Cebu si Kathryn Bernardo ug Daniel Padilla kalabot sa ilang pelikulang The Hows of Us.

Matud sa promo diva nga si Ms. Josie Pereyra moanhi gyud ang duha karong Lunes. Sa pagsulat ko niini, wa pa matino ni Ms. Josie ang venue. Atangi lang kay seguradong ipahibalo ni AC Martin ang detalye.

○○○

Naningkamot kong makatan-aw bisan usa o duha lang ka buok pelikula nga apil sa Pista ng Pelikulang Pilipino.

Nakakita gyud kog duha (ang Unli Life nila ni Vhong Navarro, Wynwyn Marquez, Joey Marquez ug mga kauban ug ang The Day After Valentines ni Bela Padilla ug JC Santos).

Nalingaw ko sa The Day After Valentines. Gipakita ang nindot nga mga talan-awon sa Hawaii (may kaamgid gud nga mga lugar dinhi sa Pilipinas). Gawas nga maayo moarte si Bela ug JC, nindot sab ang script. Nabanhaw ang lain nakong pangandoy nga makasulat og screenplay. Asa ra man gud na ba?

Pasaylo-a ko, pero wala ko malingaw sa Unli Life. Wala sab ko makadungog og katawa o bisan agik-ik na lang gikan sa ubang nanan-aw.

Nahibulong lang ko ngano nga pulos pagdayeg ang gihimo nila ni Ryan Bang ug mga kauban. Tungod ba kaha kay managhigala ug managkauban sila sa It’s Showtime?

Hinoon, lainlain man ta og hilig, gusto ug uban pa. Mao tingali. Anà!

○○○

Mga pahalipay sa TNT Boys sa ilang paglangkat sa kampyonato sa Your Face Sounds Familiar Kids. Sa tinuoray lang, kon apil pa ko sa mga hurado (unsaon?), maglisod gyud ko pagpili sa modaug kay pulos gyud maayo ang ubang contestants.

Sa tanan hinoon, si Onyok Pineda ang labing nakapahingangha nako kay nakigtigi gyud kini bisan pa sa iyang kagamay.