ABUEVA IMPRESIBO

Mga duwa karon:

(Mall of Asia Arena) 4:30 pm. - TNT Katropa vs.

Blackwater

7:00 pm. - Meralco vs. Alaska

Wa panumbalinga ni Calvin Abueva ang iyang unang adlaw isip bag-ong sakop sa Phoenix Fuel Masters ug impresibo kining miayuda aron pukanon ang Columbian Dyip, 113-107, niadtong Miyerkules sa nagpadayon nga PBA Governor’s Cup sa Araneta Coliseum.

Si Abueva kinsa gibaylo sa Alaska Aces ngadto sa Phoenix sa niaging buwan mirehistro og 12 puntos, 13 ka rebounds, lima ka assists, upat ka rebounds ug tulo ka blocks lakip sa krusyal nga itsa ni Jerramy King sa Dyip nga maoy naghatag og kasiguroan sa ilang kadaugan.

Hinuon ang solidong performance sa import nga si Eugene Phelps maoy dakong rason sa ilang dominasyon. Si Phelps mipabaha og 50 puntos ug 17 ka rebounds nga matod pa maoy iyang ikatulong higayon nga nakatigom siya og 50 puntos o kapin.

Sa laing duwa, gipakgang sa Magnolia Pambansang Manok ang duha ka sunodsunod nga kadaugan sa NLEX Warriors, 102-72.

Ang import nga si Romeo Travis nangulo sa Magnolia nga may 21 puntos ug 13 ka rebounds samtang misuporta kaniya sila si Marc Barroca nga may 13 ug PJ Simon nga may 12 puntos.

Karong gabii, subhan sa TNT Katropa ang ilang bagong import nga si kanhi Pepperdine University standout Stacy Davis sa ilang pagpakigsangak sa Blackwater sa alas 4:30 sa hapon sa laing double-header.

Ang 23-year-old Davis maoy hulip ni Mike Glover, kinsa gipapauli og sayo tungod sa makapasagmuyo nga performance niini sa ilang kapildihan, 103-90, sa NLEX sa pagsugod sa ilang kampanya.

Hinuon, bisan og wala silay import sa sunod nilang duwa, ilang gipildi ang Meralco Bolts, 92-90.