Gihimo ni Osmeña sayop: Labella; pulis mokiha

Gihulagway ni Bise Mayor Edgardo Labella nga sayop ang gibuhat ni Mayor Tomas Osmeña pagpagawas sa tulo ka dinakpan sa Police Station 1 sa Cebu City Police Office (CCPO).

Ang bise mayor, kinsa usa ka manlalaban, niingon nga kon buot ni Osmeña nga dili mapriso ang tulo ka mamaligyaay og butane gas, gisunod niya ang proseso.

“Dili gyud na husto because we have rules, laws to follow. Dunay may alleged violation of the existing law ato silang tagaan og abogado. Dili kitay mangunay og kuha kay bisan pa tuod og naa ta sa pwesto mayor ta wala na magpasabot nga mahimong lakturon ang balaod,” matod ni Labella.

Dugang ni Labella, human sa proseso kay nakalapas sa Presidential Decree Act 1865, labing maayo hatagan sa mayor og pyansa ang tulo ka akusado inay kuhaon og largo didto sa prisohan.

Ang pyansa nagkantidad og P20,000 ngadto sa P50,000 o pagkabilanggo og duha ngadto sa lima ka tuig depende sa gibug-aton sa gipasakang sumbong.

Si Osmeña niangkon nga aduna siyay sayop nga nahimo apan iyang giklaro nga igo lang siya nitabang ngadto sa mga kabus kinsa nanginabuhi sa desente nga paagi.

Apan iyang giingon nga andam niyang atubangon ang sumbong nga gilaraw sa kapulisan ipasaka batok kaniya nga obstruction of justice ug grave abuse of authority.

Matod ni Osmeña nga niadto siya sa presinto ug iyang gihangyo ang mga pulis nga kon mahimo siya na ang mokustodiya sa tulo ug wala sila nibalibad.

Ang tulo ka mga dinakpan sa Parian police nga naaktohang namaligya ug nag-refill sa mga butane canister.

Una nang giangkon sa mayor nga iyang gi kuha ang tulo ka mga lalake aron siya na ang mo kustodiya niini.

Ang hepe sa Cebu City Police Office (CCPO), Sr. Supt. Royina Garma, walay katungod ang mayor nga mokustodiya sa dinakpan nga nakalapas sa balaod.

Nakuha sa CCTV camera ang kalit nga niabot nga si Mayor Osmeña pasado alas 10 sa gabii niadtong Biyernes dungan sa pagmando sa mga pulis buhian ang tulo.

Matod ni Garma, gipahibalo siya sa Parian polcie nga gikuha sa mayor sila si Ramir Amaca, Romeo Appareca ug Romeo Cueva.

Samtang, si Garma gimandoan sa hepe sa Police Regional Office (PRO 7 Chief Supt. Debold Sinas nga mohimog imbestigasyon sa maong hitabo ug posibleng pagkiha sa mayor.

Sa seremonyas sa Heroes Day kagahapon, sila si Osmeña ug Garma namatikdan nga walay tinagdanay.