Pagbuhi ni Osmeña sa mga dinakpan

Kon tinuod man gani ni, kadakong salikwaot niining gihimo ni Cebu City Mayor Tomas Osmeña nga mao ang pagpagawas sa tulo ka mga nasakpan nga namaligya og illegal nga butane canisters. Matod pa sa taho, niadtong Biyernes sa alas 10 sa gabii, sila si Ramir Amaca, Romeo Appareca ug Romeo Cueva ang gi-release gikan sa ilang selda sa Parian Police Station human si Mayor Osmeña personal nga miadto sa maong police station aron ikustodiya ang tulo.

Way nahimo ang nahabilin nga mga pulis sa Parian niadtong higayona kay tiaw mo bay mayor ang ilang gikaatubang unya wala usab diha ang ilang officials.

Ang tinubdan mibutyag nga gipapauli dayon sa mayor ngadto sa ilang tagsatagsa ka mga pinuy-anan ang tulo nga daw sama ra og wa makahimo og kasaypanan sa balaod.

Si Russ Mark Gamallo, ang legal officer sa Department of Energy (DOE) 7, mikompirmar sa gihimo ni Osmeña human usab siya tawagi ug pahibaw-a sa taga Parian Police Station.

Matod pa nga andam silang makig-ayuda sa Police Regional Office (PRO) 7 aron ikiha ang mayor.

Ubos sa Presidential Decree (PD) 1865 nga ang mamaligya og butane canisters nga adunay gi-refill nga liquefied petroleum gas (LPG) usa ka dakong illegal kay kini mahimong maoy hinungdan sa sunog. Kay illegal man, natural dakpunon.

Pero yuna ra. Nganong karon ra man sab diay moaktibo ang mga pulis sa pagpanakop niini? Dili kaha nga usa kini ka hinungaw sa panagbikil tali sa mayor ug sa bag-ong hepe sa dakbayan sa Sugbo nga si Sr. Superintendent Royina Garma?

Aduna ba kahay nahibaw-an ni si Garma kalabot niini nga naghatag kaniya og kahigayonan nga maka-pressure sa mayor?