Gilas wa makalusot sa Korea
Tungod sa usa ka lunch meeting, wala na ko makakita sa last quarter sa duwa sa Gilas batok sa South Korea kagahapon sa udto. Samtang leading pa ang Pilipinas sa pagsugod sa among meeting, subo kay napildi diay ang atong pangbato, 91-82.
Tungod niini, out-of-contention na ang Gilas sa championship sa basketball sa Asiad sa Jakarta. Na spoiled sab ang pagsalmot ni Jordan Clarkson sa Gilas.
Bisan pa man, angayan unta nga makat-on kita nga gikinahanglan gyud sa Pilipinas ang usa ka team nga di dinali-dali pagkaporma.
Hinuon, nakahibawo man kita nga kining Gilas team karon naporma lang human halos tanan sa regular team ang nasuspenson tungod sa karambola nga nahitabo batok sa Australia.
Nakahibawo na sab kita nga mas maayo ang atong mga individual players. Hinaot nga makaduwa sila isip usa ka team sa taas-taas pa nga panahon. Hinaot sab nga makaduwa uban sa Gilas sa umaabot, ang maayong laki nga si Jordan Clarkson.
NFA
Wala ko mahibulong nga duna na say palpak ang National Food Authority (NFA) karong bag-o. Ang labing ulahi nga nahitabo mao kining giingong rice shortage sa Syudad sa Zamboanga.
Kini nahitabo bisan pa man og naabot na unta ang mga imported rice nga gipalit sa NFA pinaagi sa government-to-government nga transaction nga maoy giduso ni NFA General Manager Jason Aquino.
Gipaboran sa Malacanang kini si Aquino bisan pa sa grabing mga ebidensya sa mga anomaliya sa pagdumala sa rice supply sa nasud.
Nadayon ang giingong G2G importations bisan pa man og mao kini ang paagi sa importasyon nga ampay sa mga kurakot.
Bisan pa man sa pagbaha sa imported nga bugas nga gituohang makapakunhod sa presyo sa bugas sa tibuok nasud, nag-shortage na hinuon sa Syudad sa Zamboanga.
LAPU-LAPU AIRPORT
Dako ko nga uyon niining plano ni Presidente Rodrigo Duterte nga panganlan ang Mactan-Cebu International Airport (MCIA) nga LapuLapu International Airport.
Kon buot hunahunaon, si Lapulapu mao ang unang local nga lider nga nisukol batok sa mga Katsila nga gipangulohan ni Ferdinand Magella.
Angayan lang nga hatagan siya og dungog tungod niining iyang pagkabayani.
Alang kanako, mahinungdanon kini labi na nga nag-angat ang ika-500 kasaulogan sa tibuok nasud ug kalibotan sa pag-circumnavigate ni Ferdinand Magellan kaniadtong 1521.
Saulogon nato ang sumad sa maong makasaysayong panghitabo karong umaabot 2021 diin ang bida sa maong kasaysayan sa punto de vista sa mga Pinoy mao si Lapulapu.