By your side

Dako ang hunas sa among lugar. Parehas mi si Arnel, hilig mig suruy-suroy sa hunasan sa higayon nga hunas. Duol ra sa dagat ang tagsa-tagsa namo ka balay. Every weekend ming mopauli sa among lungsod, fifty kilometers away from the city. Graduating na mi sa college, ug nagpuyo mig boarding house sa siyudad.

Ug kay Sunday man ron, maong nia mi sa among probinsiya. Bugnaw ang hangin kay hapon na man. Nalingaw ming nagtan-aw sa mga tawo nga nanginhas. Ingon gyud ani kon dako ang hunas, magdugok ang mga manginhasay labi nag mosaka ang kinhason nga aninikad. Apan lahi mi si Arnel, di mi manginhas.

Ang among tuyo mao ra ang paghanggap og preskong hangin kay sa siyudad, polluted na man.

Aside from that, duna na say handomanan namo ang hunasan kay dinhi man mi magkasuod. Sa hunasan sab nagsugod sa pagpangulitawo si Arnel nako. Ug sa hunasan ko sab siya sugta. Third year college pa mi niadtong tungora.

So, one year na ang among relationship.

“Pag-amping didto, ha,

Nel?”

Mikupot ko sa bukton sa akong boyfriend.

“Ikaw sab dinhi, Jean, take good care sa imong kaugalingon. Malipay gyud ani si Carlo kay dugay-dugay kong tua sa Manila. Makalugar gyud siya sa pagpakig-estorya nimo.”

“Sus, magselos pa gyud na siya, uy.” Gikusi kog hinay ang kilid ni Arnel. “Ikaw ra ang akong love, Nel. Bisag asa ka, ang akong gugma naa kanunay sa imong kiliran. My love is always by your side.”

Nindot og smile si Arnel nako. Gusto ko nga mosalig gyud siya nako pinaagi sa akong pagpanumpa nga di ko mangitag laing lalaki samtang wa siya. Tennis player si Arnel sa university nga among gitunghaan. Dunay tournament sa mga university sa tennis nga adto ipahigayon sa Manila. Ug ang akong boyfriend maoy gipadala sa among eskuwelahan nga maoy mosalmot sa maong torneyo.

“Mokuyog ang inyong coach, no, Arnel?”

“Siyempre, mouban gyud siya.”

“Pila mo ka buok gikan sa atong eskuwelahan?”

“Duha ming laki, ug duha sab ang babaye. Dunay single tournament, ug may double sab.”

Miyangu-yango ko. Unya nakatan-aw ko kang Carlo nga nagpaingon kanamo ni Arnel.

Nagkatinan-away mi ug ang akong boyfriend.

(SUMPAYAN)