Dugang 2,000 ka mga kahoy gitanom sa Cebu Archdiocese pocket forest
Ang pakig-alayon sa Archdiocese sa Sugbo ug Solid Earth Development Corp. (SEDC) sa pagpadako og mga kahoy padayong miuswag human sa ikaduhang hut-ong nga nakapananom og dos mil nga niluyong, dugang sa 1,600 nga unang natanom.
Nagkauyon ang duruha ka mga institusyon pagka-Pebrero 2017 nga mananom og 10-mil ka mga kahoy sulod sa 7-ektarya nga luna nga kanhi giminahan sa SEDC sa bukirang bahin sa San Fernando nga sakop sa parokya sa San Agustin de Hippo.
Gani, giila sa Department of Environment and Natural Resources (DENR) ug sa Mines and Geosciences Bureau (MGB) sa tunga-tungang Kabisay-an ang SEDC sa pag-abag sa unang parokyanong community-based pocket forest sa Sugbo.
Mitimaan ug mitinunol sa maong paila sila si DENR-7 OIC regional director Emma E. Melana ug Eng’r. Loreto B. Alburo, ang MGB-7 regional director, pagka-Hunyo 29, walo ka adlaw human sa second wave nga pagpananom.
Human sa unang hut-ong nga gipasingunhan mismo sa Arsobispo sa Sugbo nga si Jose S. Palma, D.D., ang ika-2 pagka-Hunyo 21 nga may 91 nga miboluntaryo nakapa-abot sa kapin sa katlu-an sa gidaghanon sa kahoy nga buot itanom sa maong dapit.
KALIHUKAN
Lakip sa miboluntaryo ang 45 ka mga parokyano pinanguluhan ni Padre Murphy Sarsonas, kura paroko ug pangulo sa Archdiocese Commission on Environmental Concerns, 11 ka opisyales sa Magsico pinanguluhan ni Kapitan Johnny Arriesgado, ug sa municipal agriculturist nga si Nelson Soronio.
Miapil sab ang 30 ka mga kawani si SEDC ug laing upat gikan sa TCPI pinanguluhan sa environment and safety officer nga si Dwight P. Avila sa pagpananom sa 900 ka Mahogany, 500 nga Narra, 300 nga Star Apple ug 300 nga Duhat.
Gibutyag ni Mitzie Almira I. Carin, tagduma sa SEDC human resources and administration division, nga ugmaron pa ang maong dapit nga gipanganlan na og SEDC-St Augustine EcoPilgrimage Park.
Mamahimo na uyang mapahigayon didto ang mga seminar, kamping, pagpanumdum, ug mga estasyon sa krus, samtang alimahan sa SEDC ang parke ug iseguro ang pagdako sa mga kahoy sumala sa gisaad niini ubos sa kasabutan sa Archdiocese.
Samtang gisaad sa parokya nga lihokon ang mga kahugpongan ug kalihukan sa simbahan aron makab-ot ang tumong nga matanom ang 10-mil ka mga kahoy, abagan ang SEDC sa pag-alima ug pagseguro ang pagtubo nila, ug itaho sa Archdiocese matag quarto.