PANTAWID CARDS ‘MAS ANGAY SA DRIVERS’

Niangal ang Pinagkaisang Samahan ng mga Tsuper at Operators Nationwide (Piston) Cebu niining gipanghatag ron sa Land Transportation Franchising and Regulatory Board (LTFRB) nga Pantawid Pasada Program fuel subsidy cards tungod kay daw di ang mga drayber ang makapahimulos niini.

Sukad niadtong Martes hangtod kagahapon, naka-release na ang Landbank og 241 ka mga subsidy cards base na usab sa datus nga natala sa LTFRB 7 Regional Director Eduardo Montealto Jr.

Matod sa tigpamaba sa Piston Cebu Greg Perez nga giklaro unta sa LTFRB o sa balaod ubos sa Tax Reform for Acceleration and Inclusion (Train) Law nga ang drayber ang makapahimulos niini, di ang operator sa jeepneys.

“Unta giklaro na ang tinuod nga mga benipisyaryo nga mga driver ang matagaan. Among tan-aw bulahan ang mga operator niini nga pamaagi,” si Perez sa text message sa Superbalita Cebu.

Dugang ni Perez nga sila sa Piston Cebu moabot sa 500 ka mga drayber di matagaan niini tungod kay mag-abangan raman og jeep sa mga operator.

Gibutyag usab niini nga ang mga drayber nga moabang sa jeep ngadto sa operator, sila pa ang mopatubil sa unit nga ilang abangan.

Base na usab sa datus ni Perez, anaa sa P800-P1,200 ang abang sa jeep depende sa unit.

Samtang moabot sa P700-P1,000 ang gasolina sa mga drayber.

Gikan sa kita niini matag adlaw nga gibana-banang anaa sa P2,500, matod ni Perez nga P300-P500 nalang ang mauli sa drayber nga kita, kuhaan pa sa suhol sa drayber sa konduktor kon anaa.

Sa pagkakaron, anaa nay 500 ngadto sa 700 ka miyembro ang Piston Cebu ug kasagaran niini mga drayber.

Hinuon dugang ni Perez nga kon anaa’y operator nga ipagamit sa ilang drayber ang maong cards, maayo.

“Posible kami dire sa Cebu sunod semana paningkamutan namo nga makaestorya gyud mi sa director para mapadangat namo niya nga dili mao ang ilang pagpatuman sa maong hinabang nila sa mga drivers,” dugang ni Perez.

WA MAGKINAHANGLAN

Di mangayo og fuel subsidy ang duha ka mga pundok sa mga taxi ug mga bus ug mini bus operators sa Sugbo gikan sa nasudnong kagamhanan sama sa nadawat sa mga operator og public utility jeepney.

Niadtong Martes, gisugdan sa Land Transportation Franchising and Regulatory Board (LTFRB) sa Central Visayas ang pagpanghatag og fuel subsidy cards sa Pantawid Pasada Program nga may sud nga tag P5,000 matag usa.

Matod ni Richard Cabucos, presidente sa Metro Cebu Taxi Operators Association (MCTOA), gi-adjust na ang ilang pletihan sa mga taxi hinungdan nga dili na sila mangayo og ayuda sa gobiyerno sa pagpatubil og mga produktong petrulyo.

“Adjusted naman na ang rate daan, okay ra mi sa amo. Dili na mi mangayo anang gipanghatag sa national government,” dugang ni Cabucos sa pakighinabi sa Superbalita Cebu kagahapon.

Sigon niya dili sila mamugos sa mga pasahero nga mosakay nila, kondili kadto lang maka-afford mosakay og taxi.

Alang kang Julito “Julie” Flores, chairman sa Cebu Provincial Bus and Mini Bus Operators Cooperative (CPBMBOC), adunay kaya ang mga operator og bus ug mini bus kon itandi sa mga operator og PUJ.