DRUGAS GABAHA SA CEBU
BISAN SA SUBSUB NGA OPERASYON; GARMA NANGAYOG TABANG SA PUBLIKO
Nanghunaw ang kapulisan nga sila ang naghatag og mga impormasyon kang Presidente Rodrigo Duterte hinungdan sa pagpangasaba niini kang Cebu City Mayor Tomas Osmeña niadtong Huwebes sa gabii.
Makigkita unta ang Presidente kang Osmeña aron hisgutan ang kalabot sa drugas.
Iyang gipasanginlan si Osmeña nga namasangil nga siya drug protector.
Apan matod sa mayor nga ang PRO 7 ug Presidential Assistant for the Visayas Michael Dino mao ang naghatag og sayop nga impormasyon kang Duterte.
Nibahad si Duterte kon magkita sila, iyang tamparuson si Osmeña bisan atubangan sa daghang mga tawo.
Matod ni Superintendent Reyman Tolentin nga daghan ang mohatag sa kasayuran sa Presidente, diin di lang pulis nga makahimo niini.
“Ang Presidente he has all the resources. So nakakuha siyag mga info because being the President,” matod ni Tolentin.
Si Cebu City Police Director Senior Superintendent Royina Garma, sa iyang bahin, nagkanayon nga wa silay labot sa kasuko sa Presidente ngadto sa mayor.
Di usab sila ang nagsolsol sukwahi sa pasangil ni Osmeña.
“Wala akong opinion dyan. Kung nagalit ang ating Presidente, wala na koy labot ana,” matod ni Garma.
Niaslom ang relasyon sa kapulisan sa syudad ug ni Osmeña human gipasanginlan sa mayor nga ang mga pulis ra usab ang responsabli sa sunodsunod nga patay sa syudad.
Niadtong Huwebes, gipasakaan og lima ka mga kaso ang mayor tungod sa pagpagawas sa tulo ka mga piniriso sa Parian police station nga namaligyag butane canister nga gitubilan sa liquefied petroleum gas (LPG).