Labella naglaum sa suporta ni Duterte

Kon ipahigayon ang eleksyon karon, napanglantawan na ni kanhi mayor Michael Rama ang kadaugan ni Bise Mayor Edgardo Labella pagka-mayor sa dakbayan sa Sugbo sa piniliay sunod tuig.

Si Labella maoy standard bearer sa Barug Team Rama, kinsa makig-atbang kang Mayor Tomas Osmeña nga bagohay lang gikastigo ni Presidente Rodrigo Duterte atol sa 49th founding anniversary sa dakbayan sa Mandaue.

Atol sa pormal nga paganunsyo sa Labella-Rama tandem kagahapon, ang kanhi mayor niingon nga yawe sa ilang kadaugan sa umaabot nga piniliay mao ang panaghiusa nga maoy giingong kuwang sa Bando Osmeña Pundok Kauswagan (BOPK).

Ang bise mayor mapasalamaton kang Rama, iyang giila nga leader sa grupo, sa pagsalig sa iyang katakos aron mahimong standard bearer.

Usa sa gipahimug-atan sa kanhi mayor ang tabang ni Presidente Rodrigo Duterte, kinsa mosuporta sa ilang local nga partido alang sa umaabot nga piniliay.

Si Rama nahimong third termer nga konsehal, 3rd termer nga vice mayor ug two-time mayor sa Cebu City apan giparot siya ni Osmeña niadtong 2016 elections. “I was out of town all week as I sought discernment from the Almighty. After much reflection, I have decided to seek the office of the vice mayor for the 2019 elections,” padayag ni Rama sa iyang Facebook page nga Mike Rama.

Ang pangulo sa Team Rama wa nianunsyo sa ilang line-up pagka-konsehal sa north ug south district.

Apan didto silang kanhi barangay kapitan Ramil Ayuman, Konsehal Joel Garganera, Raymond Garcia, Noel Wenceslao, Ernest Herrera, Raddy Diola samtang sa south didto silang Kapitan Phillip Zafra, kanhi kongresista Tony Cuenco, Joey Daluz ug Edu Rama.

Kini sila nagsige na og suroy sa ilang mga distrito, matod ni Rama. MODAUG KO: OSMEÑA

Bisan kon wa pay eleksyon, gipaniguro na ni Osmeña nga siya ang modaog sa piniliay sunod tuig.

Iyang gipadayag nga si Labella maoy lig-ong kandidato sa opposition sanglit matod pa niya, si Rama mapilde bisan kinsa nga kandidato.

“This is even better for us because while I can very much beat Edgar, anybody can beat Mike,” matod sa Facebook post ni Osmeña.

Ang mayor klaro nga magpasubli sa iyang posisyon, apan hangtod karon, wa pa gibutyag sa BOPK kon si kinsa ang iyang mamahimong runningmate./

/ AMPER CAMPAÑA ■ LABELLA-RAMA: Ang partido Barug- Team Rama pinangulohan ni kanhi mayor Michael Rama ( ikaupat gikan sa wala) ug si Cebu City Vice Mayor Edgar Labella ( ikatulo gikan sa wala) pormal nga mipahibawo sa ilang tandem kagahapon. Uban kanila sila si gikan sa wala) Konsehal Joey Daluz, Edu Rama, kanhi kongresista Tony Cuenco, kanhi mayor Alvin Garcia, Konsehal Raymond Alvin Garcia ug uban pa.