Kasong libel batok kang Mabatid gibasura sa korte

Gumikan sa kakuwang og basehanan, gibasura sa piskaliya sa dakbayan sa Sugbo ang reklamong libel nga gipasaka sa magtiayong magpapatigayon nga sila si David ug Eva De Los Santos batok kang Mabolo Barangay Kapitan Prisca Niña Mabatid, mga editor-in-chief ug mga tigsuwat sa tulo ka mantalaan sa Sugbo, apil ang Superbalita ug SunStar Cebu.

Sa lima ka pahina nga resolusyon nga pirmado ni Cebu City Prosecutor Liceria Lofranco-Rabillas ug pinetsahan og Agusto 28, 2018, wa kini makakita og malisya sa pamahayag ni Mabatid nga nipasangil sa magtiayong nangilad niya sa pagpalit nga P2.5 milyones nga townhouse nga ilang gipanag-iya niadtong 2016.

Apil sa gibasura ang reklamong libel batok ni Michelle So, editor-in-chief sa Superbalita Cebu, Isolde Amante, editor-in-chief sa Sun.Star Cebu ug ubang mantalaan.

Si Mabatid, ang tag-iya sa Pinoy Care Visa Center, Inc., nga kanhi gitrabahoan sa magtiayon.

Sa complaint judicial affidavit sa duha, sila nireklamo batok ni Mabatid nga nidaot sa ilang reputasyon pinaagi sa live interview sa Facebook alas 3 sa hapon niadtong Disyembre 19, 2017 sa dihang nisangat og reklamo ang kapitan sa National Bureau of Investigation batok nila.

Ang estorya napublikar sa mga pamantalaan apil sa Superbalita, Sun.Star Cebu ug The Freeman niadtong Disyembre 21, 2017.

Apan sa iyang tubag, si Mabatid nangangkon nga ang iyang pag-adto sa NBI alang sa pagpasaka niya og reklamong estafa batok sa magtiayong De Los Santos kabahin sa iyang gipalit nga townhouse gikan nila.

Human sa evaluation sa ebidensiya sa isig ka habig, ang Cebu City Prosecutors’ Office wa makakita og kapasikaran nga nakahimo og krimen sa libel ang mga gipangreklamo.

“There is therefore, grave and serious doubt on complainants’ accusations, at least for the purpose of determining probable cause...Complainants failed in this regard. It being the case, all the herein respondents should be tried as charged,” tipik sa maong resolusyon.

Si Mabatid nalipay sa desisyon sa piskaliya. “God is so good. Truth will always prevail! I hope I can get my P2.5M back from these people so I can donate it to the cancer patients,” sumala sa kapitan sa Barangay Mabolo.