Duterte buot nga PNP, AFP apil sa housing sa Mandaue
Gimanduan ni Presidente Rodrigo Duterte ang general manager sa National Housing Authority (NHA) nga hatagan og housing units ang mga kawani sa Armed Forces of the Philipines (AFP) ug Philippine National Police (PNP) sa dakbayan sa Mandaue.
Kini maoy gibutyag mismo ni Marcelino Escalada Jr. sa NHA sa dihang iyang gipresentar sa presidente ang lowrise housing project sa iyang buhatan ngadto sa Brgy. Looc, sa dakbayan.
Si Escalada nikuyog ni Duterte sa pagbisita sa Mandaue atol sa kasaulogan niini sa ika-49 nga Charter Day sa dakbayan didto sa City Cultural and Sports Complex niadtong Huwebes.
“The president before he entered the court, he made an instruction, that he will also give housing units for both AFP and PNP in Mandaue City,” ni Escalada atubangan sa mga Mandauehanon nga nitambong sa maong kalihukan.
Wa hinuon gibutyag ni Escalada kon pila ka unit ug pila ka mga pulis ug miyembro sa AFP ang makabenepisyo unya sa maong proyekto.
Ang rebelasyon ni Escalada nahitabo human niya gipresentar ang video sa lowrise socialized housing project alang sa mga informal settlers sa Brgy. Looc ug medium-rise housing project alang sa mga kawani sa city hall sa Brgy. Labogon.
Maayo kini nga balita alang sa mga miyembro sa PNP ug AFP apan ang problema kon asa ibutang ang mga housing units sa Mandaue.
Ang dakbayan adunay dakong problema sa luna kon asa ipahimutang ang nagtikadaghang populasyon sa mga illegal settlers.
“It’s a good development as it is so expensive to have a lot in the urban areas and to include us in the socialized housing. It is very much advantageous to us and a manifestation of the president’s concern to the PNP and AFP,” ni PSSupt. Jullian Entoma, hepe sa Mandaue City Police Office sa dihang gikuhaan og habig kalabot niini.
Sa iyang bahin, si Mayor Luigi Quisumbing nipasalig nga motabang sa pagpangita og luna alang sa maong proyekto sa NHA.
Human sa presentation ni Escalada, si Duterte nihatag dayon sa iyang speech ngadto sa Mandauehanon diin siya maoy giimbitar nga guest of honor sa kasaulogan sa pagkadakbayan sa Madnaue ning tuiga.