Kalbaryo ni Osmeña?

Aduna pa man tuoy igong panahon nga makabawi pa, apan kadtong grabing birada ni Presidente Rodrigo Duterte batok ni Cebu City Mayor Tomas Osmeña sa niaging adlaw atol sa iyang speech sa Mandaue City Sports Complex, usa ka dakong hulga ngadto ni Osmeña sa umaabot nga piniliay.

Dili man tuod kabahin og pulitika ang gihisgutan ug gibato sa presidente batok sa mayor, pero masabot nga adunay halawom nga kaligotgot ug pagdumot si Duterte ngadto ni Osmeña nga mahimong molanat pa hangtod panahon sa piniliay.

Buot ipasabot nga kadtong maong birada posibling pasiuna lang sa daghan pa unyang mga pag-alkontra o pag-ataki nga sagubangon sa mayor sa umaabot nga mga adlaw.

Napuno man tuod sa abiba ang presidente sa iyang pagpangataki apan bisag unsaon nato pagbalik-balik sa pagpaminaw ang iyang gipanulti, wa gyud tay matino ug matumbok kon nganong grabi ang iyang kasuko sa mayor.

Tiaw mo bay iyang gipangantihan nga tamparuson ang mayor sa higayon nga magkaatubang sila ug gihinganlan pa kini nga hambugero ug arogante nga pagkatawo.

Dunay mga pangagpas nga tungod kini sa panagbikil ni Osmeña ug sa bag-ong hepe sa Cebu City nga si Sr. Supt. Royina Garma, nga giingong lunod-patay nga tigsuporta sa presidente. Wa usab isalikway ang posibilidad nga ang hunghong sa iyang higpit nga kontra nga si Michael Dino, ang secretary sa Office of the Presidential Assistant for Visayas (OPAV), maoy usa sa hinungdan.

Tinuod nga dili bag-o alang sa mayor kining pagpakigbikil ilabi na batok sa mga public of icials kay kadaghan na man sab ni siya makakita og kasungi-an. Apan batok sa presidente siya sayod kon unsay iyang madangatan.

Mahimo kaha kining kalbaryo sa pulitika ni Tomas? Kini maoy atong lantawon sa unahan.