PDP-Laban nabungkag
Nanawagan og kahiusahan ang PDP-Laban nga maoy gisakyan ni Pres. Rodrigo Duterte sa iyang pagdagan sa 2016. Siya maoy chairman samtang si Sen. Koko Pimentel maoy pangulo sa partido. Karong buwana sa Sept. mopatawag og hiniusang tigom si Duterte paghilot sa nagkasungi nga mga sakop sa PDP-Laban nga gamay rang partido apan kalit milabong ngadto sa 100,000 ka lig-on nga mga sakop.
Nauyog ang partido sa dihang gitangtangan sa katungdanan sila si Senate President Pimentel ug House Speaker Pantaleon Alvarez. Dugangan pa nga nagtukod og regional party Hugpong Ng Pagbabago (HNP) si Davao City Mayor Sara Duterte nga nagduso usab og kamada sa mga modagan og senador. Siyam na ka partido ang miipon sa HNP nga tulo ang nasyonal nga mao ang NPC, NUP ug NP samtang unom ang lokal nga mao ang SBP-Quezon, Abaka-Bohol, APP-Zamboanga del Norte, APP-Jalosjos, Ilocano Timpuyog-Ilocos Norte, Kambilan-Pampanga ug Padayon Pilipino-Misamis Oriental.
Lain sab ang Partidong Fideral Ng Pilipinas nga gitukod sa MRRD-NECC kansang mga sakop dakog tampo sa ilang kusganong pagpangompanya ni Duterte sa 2016. Nabahin usab ang PDP-Laban sa grupo ni Pimentel ug sa classmate ni Duterte nga si Atty. Rogelio Garcia.
Sa paksyon ni Pimentel nakapadangat na ngadto ni Duterte og senatorial lineup nga gilangkoban sa par- ty mates, friends of the party ug reelctionist senators. Party mates sila si Bong Go, Francis Tolentino, Pimentel, Karlo Nograles, Zagid Mangudadatu, Geraldine Roman, Monsour del Rosario, Freddie Aguilar, Jiggy Manicad, Albee Benitez ug Dakila Carlo Cua. Friends of the party sila Sara Duterte, Bato dela Rosa, Robin Padilla, Lito Lapid, Rafael Alunan, Ramon Tulfo, Harry Roque ug Pia Cayetano.
Reelectionist senators sila Cynthia Villa, Sonny Angara, JV Ejercito, Grace Poe ug Nancy Binay. Sa Pulse Asia Survey sa tung-tunga sa 2018 maoy nakasulod sa top 12 sila si Poe, Cayetano, Villar, Sara, Angara, dela Rosa, Pimentel, Binay, Lapid ug Ejercito. Ika-10 si Serge Osmeña apan wala malakip sa listahan sa PDP-Laban.
Samtang nauyog ang PDP-Laban mitumaw kadtong huna-huna nga moluwat sa katungdanan si Duterte. Rule of succession si Vice Pres. Leni Robredo maoy mopuli apan dili haom sa kagustohan.
Naghisgot si Duterte ni Bongbong Marcos apan kinahanglan pa nga modaog sa protesta o kaha itudlo nga transition president kon ang bag-ong konstitusyon maratipikahan. Sa kasaysayan si Sergio Osmeña Sr. mipuli sa Agusto 1, 1944 sa dihang namatay si Pres. Manuel Quezon, Elpidio Quirino sa Abril 7, 1948 sa dihang namatay si Manuel Roxas ug Gloria Arroyo sa dihang mitalikod si Pres. Joseph Estrada sa Edsa 2.