By your side
Nahiabot ang higayon nga mopauli na sila si Arnel kay nahuman na ang tournament sa tennis. Gitawgan ko niya sa selpon ug iya kong gipahibawo nga na-champion siya sa single. Nalipay ko ug gipahalipayan ko siya. Hinuon, napilde sila sa double.
“I’m proud of you, Nel.” “Thank you, Jean.” Pagkahuman sa among pag-estorya ni Arnel sa selpon, mipadayon ko paglakaw. Hapon niadtong tungora. Mao pay pagkahuman sa akong klase. Pag-abot nako sa main lobby, nakita ko si Carlo nga morag naghuwat nako.
Nagpahiyomay mi. Sukad lang nga iya kong giluwas sa dagat, maayo na kaayo kog tinagdan niya.
“Ihatod tika sa inyo, Jean.” Misugat si Carlo nako. “Sige.” Dali ra kaayo kong nakatando. Nagkuyog mi sa paggawas sa gate sa eskuwelahan.
“Pero sa di pa tika ihatod sa inyo, mag-esnak una ta diha sa Goldilocks.”
Wa ko mobalibad kang Carlo. Gigutom sab ko niadtong tungora. Gawas pa, komportable na man ko kon ikauban ko siya. Bisag duna na koy boyfriend, pero para nako di man daotan ang pagpakig-uban ko kang Carlo og panagsa. Wa man koy plano nga sugton ko siya. Ang akong pagpakigsuod niya giisip ko man lang nga bayad nako sa utang kabubut-on ko niya. Kon wa pa siya, patay na tingali ko ron. Nalumos na gyud tingali ko niadtong gibikogan ko samtang naglanguy-langoy sa dagat. Lawom pa gyud ang lugar nga akong nahimutangan. “Salamat, Jean, ha?” Nakahunong ko pagkaon. Mao pay pagsugod namog esnak. Nakatan-aw ko kang Carlo.
“Salamat? For what, Carl?” Wa ko makasabot sa giingon ni Carlo.
“Sa pagtugot nimo nako nga mopadayon ko sa paghigugma nimo.”
Nabatyagan ko ang pag-blush sa akong nawong. Nakaduko ko. Miinom ko sa akong pineapple juice. Morag mikalit pag-uga ang akong tutunlan.
“Malipayon na kaayo ko ani, Jean. Nalipay ko nga usahay mokuyog ka nako, parehas karon.”
Gitan-aw ko si Carlo. Nindot kaayo siyag pinahiyoman. Nasabtan nako nga naggikan gyud sa iyang kasingkasing ang gibati niyang kalipay. Nakaginhawa kog lawom.
“Pero usbon nako, Carl, nga wa tika tagaig paglaom. Nakahibawo ka na nga boyfriend ko si Arnel.”“I know. As I’ve said, nalipay na ko nga gitugtan ko nimo nga magpadayon ko sa akong pagpangulitawo nimo.”
Nahilom ko.
(SUMPAYAN)