3-0 TARGET SA UC; UV MOBANGON

Mga duwa karon

1:00 pm- SHS-AdC batok

CEC ( jrs)

2:30 pm- UV batok USC ( jrs) 4:00 pm- UC batok SWU

(srs)

5:30 pm- CITU batok UV

(srs)

Mosuway pagbangon gikan sa duha ka sunodsunod nilang kapildihan ang back-to-back champions UV Green Lancers sa ilang pagpakigbatok sa sama nilang wala pa’y daog nga CITU Wildcats sa main game karong hapon sa CESAFI college basketball sa Cebu Coliseum.

Sa kasaysayan sa liga, mao kini ang labing unang higayon nga nabunyagan ang Green Lancers og duha ka sunodsunod nga kapildihan.

Nakatilaw kini’g kastigo batok sa USJ-R Jaguars, 89-73, niadtong Agusto 26 Unya sa ikaduha nilang tahas, mas sakit ang ilang nasinati gumikan kay sa labing una sab nga higayon, nakatilaw sila og pilde batok sa usa ka huyang puwersa sa liga - ang University of Southern Philippines Foundation (USPF) Panthers, 81-80.

Nagkanayon si Green Lancers coach Gary Cortes nga iyaha pang tugkaron kon nganong kuwang og kasingkasing nga mokombati ang iyang mga magduduwa.

“Ambot lagi, mura’g kuwang man gyud sa ‘puso’ (kasingkasing) manuwa ang akong players hilabi na ang among big men. Mura ma’g dili champions,” matod ni Cortes.

Hinuon malaumon si Cortes nga makabawi ra sila sa kasamtangan nilang pagkapandol ug makasubay sa tul-id nga dalan paingon sa gitinguha nilang Grandslam title.

Ang Wildcats, nga 0-2 usab, mamasin sab nga makabangon gikan ilang pagkapildi sa SWU Cobras, 87-53, ug USC Warriors, 102-55.

A UC Webmasters mosuway pag-angkon sa solong liderato batok sa Cobras, (1-1).

Sa high school division, magkombati ang Sacred Heart School-Ateneo de Cebu (SHSAdC) Magis Eagles batok Cebu Eastern College (CEC) Dragons sa premirong duwa samtang mag-abot sa ikaduhang kombati ang UV Baby Green Lancers ug USC Baby Warriors.