Taga SMS unang gold medalist sa Milolympics

Bitbit ang pangandoy nga mahaw-as sa kawad-on ang iyang pamilya, malampusong nadepensaan ni Jessie Abelgas ang iyang gold medal sa 5,000 meters boys event sa 2018 MILO Little Olympics athetics event kagahapon sa Cebu City Sports Complex.

Ang 16 anyos nga Grade 11 nga estudyante sa Sisters of Mary Boys Town sa lungsod sa Minglanilla, Cebu mao ang nilangkat sa labing unang gold medal sa kompetisyon.

Ang lumad nga taga Abuyog, Leyte mioras og 17:19:00 aron patigbabawan ang lumba.

“Nag-motivate nako mao ang among kapobrehon,” matod sa ikaupat sa lima ka mga magsuon.

“Gusto nakong makatabang sa akong pamilya pinaagi sa akong pagka-athlete.”

Gipasabot ni Abelgas nga kinahanglan niyang mokayod og maayo hilabi na nga nipanaw na ang iyang inahan unya atoa sa Bacolod ang iyang amahan.

“Naa pa ko’y tulo ka mga manghod nga gusto nakong tabangan,” dugang ni Abelgas.

“Nanghinaot ko nga naay mohatag nako og scholarship sa college para makahuman ko sa pag-eskuwela ug hinaot nga ma-member sab ko sa Philippine team.”

Ang maestro ug coach ni Abelgas nga si Mark Cantal miingon nga ang kalampusan ni Abelgas bunga sa iyang grabeng paningkamot sa training.

“After siya naka-gold last year sa same event, wala’y hunong ang iyang training,” matod ni Cantal.

tNagsunod kang Abelgas ug mikuha sa silver medal mao si Jemar Morales sa Abellana National School (ANS) ug milangkat sa bronze medal si Dave Nicole sa University of San Carlos (USC)-BED.

Ning pagsuwat, wala pa’y nakuhang resulta sa ubang events.