Nietes target ni Rungvisai
Anaa man tuod ang pagtutok ni World Boxing Council (WBC) ug Ring world superflyweight champion Srisaket Sor Rungvisai sa iyang umaabot nga kontra nga si Iran Diaz karong Oktubre 6 didto sa Bangkok, Thailand, apan wa niya ikalimod nga usa sa iyang target nga makontra mao si Filipino three-division champion Donnie “Ahas” Nietes.
Si Nietes gikatakda usab nga makigsangka sa kataganasod nga si Aston Palicte alang sa bakanting World Boxing Organization (WBO) title karong Septiyembre 8 (Septiyembre 9 sa Pilipinas) sa The Forum, Inglewood, California.
Kon modaog si Nietes, gusto ni Rungvisai nga suwayan niya sa pagpakigsangka ang usa sa giilang pinakamaayong boksidor nga naumol sa Pilipinas.
“The thing is if I get to fight Nietes in the future it will be a great fight because he’s a great fighter,” matod ni Rungvisai, pinaagi sa iyang interpretes.
Iya man tuod gidayeg si Nietes nga usa ka maayong champion, apan iyang gipasabot nga gamay ra kini sa 115 lbs. nga timbang.
Samtang sa laing bahin, usa ka Thai boxer ang mibuak sa record ni Floyd Mayweather Jr. human niya malangkat ang ika-51 nga kadaugan pinaagi sa pagkulata sa Filipino challenger niadtong Miyerkules aron depensaaan ang iyang World Boxing Council (WBc) title.
Si Wanheng "Dwarf Giant" Menayothin mipukan sa Pinoy fighter nga si Pedro Taduran aron depensaan ang iyang 10-pound minimumweight champion niadtong Miyerkules didto sa Thai City sa Nakhon Sawan.
Kadto maoy iyang ika-51 nga sunodsunod nga kadaugan ug wala pay pildi nga maoy nakalabaw sa 50-0 record nga gihuptan ni Mayweather Jr.