KANHI GOBERNADOR NAMATAY SA CANCER

Patas ang pagtagad, matinuoron ug hands-on nga opisyal, di mangwarta ug maluluy-on sa mga tawo labi na sa mga kabos, ang pipila sa mga hiyas ni kanhi gobernador Vicente “Tingting” de la Serna nga di makalimtan sa iyang mga higala ug minahal sa kinabuhi.

Si Tingting namatay alas 12:05 kagahapon sa tungang gabii gumikan sa lung cancer.

Siya nagpanuigon og 66 ug may tulo ka mga anak nga mga babaye ug usa ka lalake.

Sumala ni Gobernador Hilario Davide III, higala ni Tingting, mahinunduman ang kanhi gobernador isip matinuoron ug maluluy-on nga lider nga dunay pagbati sa mga kabos.

Si Luis Moro, Jr., suod nga higala ni Tingting, nikompirmar nga ni-text ang usa sa mga anak niini gamit ang cellphone number ni Tingting ug nipahibawo nga namatay ang iyang amahan.

Matod niya, patas ang pagtratar sa kanhi gobernador bisan kon unsa pa ang estado niini sa katilingban.

“Kon unsay kan-on ni Tingting, og mokaon siya og steaks, ang kan-on sa driver kay steak sad. Wala siya mo-discriminate ba kay driver man, lain ang pagkaon,” paghinumdom niini sa iyang higala nga kanhi kongresista usab sa ikaunom nga distrito.

Gidugang ni Moro nga usa ka opisyal nga dili mangwarta si Tingting ug kanunay moinspeksyon sa mga proyekto kon nagtrabaho ba ang mga tawo sa dihang usa pa kini ka gobernador.

“He wanted people to be well ba, molambo ang mga tawo. Dili pareho anang ubang politicians they talked to you that way pero sa tinuod, they don’t really care for you. Kani siya he really cared for his people,” dugang paghulagway ni Moro kang Tingting.

Sigon ni Dr. Frances de la Serna, na-diagnosed ang iyang amahan og lung cancer niadtong Septiyembre 2017 ug nipaubos kini og chemotherapy.

Ang haya naa sa ilang panimalay sa Sto. Niño Village, Barangay Banilad, siyudad sa Sugbo.

Si Tingting i-cremate karong adlawa ug dad-on ang mga abo sa Cebu Memorial Park Cemetery sa Barangay Banilad ning siyudad human sa alas 7 sa buntag nga misa.