LOW PRESSURE.

Maorag sapa ang karsada sa Nasipit, Barangay Talamban, dakbayan sa Sugbo dihang mibunok ang uwan kagahapon sa hapon. Ang pag-uwan dala diay sa low pressure area nga nasigpatan sa Samar, apan nahilis ra usab.

Bisan kon hingpit nang nahilis ang Low Pressure Area (LPA) nga namat-an sa Borongan, Eastern Samar, apan magpabilin nga masinati sa Sugbo ang paguwan.

Moluntad pa kini bisan karon sa umaabot nga semana.

Matod sa Philippine Atmospheric, Geophysical and Astronomical Services Administration (Pagasa) Mactan nga tungod kay aduna’y bagyo gawas sa Philippine Area of Responsibility (PAR),ga makasinati gihapon og madag-umon nga kalangitan ang Luzon ug Visayas.

Ang maong bagyo nga aduna’y international name nga Jebi gikatakda usab nga mosulod sa PAR, apan di kini maka-landfall ug layo ra kini.

Gikatakdang tawagon ang maong bagyo nga “May-May.”

Matod ni Netherlen Saletrero, weather specialist 1 sa Mactan Cebu, nga tungod sa extension sa maong bagyo pabilin nga makasinati og bati nga panahon ang Sugbo.

Anaa sa hapon ngadto sa gabii gipanglantawan nga mobunok ang uwan.

Kagahapon lang dihang kusog nga uwan ang nasinati sa pipila ka dapit sa dakbayan sa Sugbo, lakip na ang Talamban, Lahug, ug Guadalupe nga nakatala dayon og pagbaha.

Hinuon, sa rain gauge sa Pagasa Mactan anaa lang sa 1 millimeter ang natala nga uwan.

Alang sa Septiyembre, anaa sa 192.1mm sa uwan ang average nga masinati sa Sugbo.