Gibayaw sa kalipay dihang iyang naka-selfie si Duterte
Wa magdahum si Konsehal Malcolm Sanchez sa dakbayan sa Mandaue nga nakaduol siya ni Presidente Rodrigo Duterte samtang namulong atol sa pagbisita niini sa Mandaue niadtong Huwebes sa gabie.
Gawas niini, gihatagan siya og libro ug naka-selfie pa siya uban sa Presidente.
Talagsaon kini nga paghitabo ilabi na nga grabe ka istrikto ang mga Presidential Security Group (PSG) nga nagbantay sa Presidente.
Atol ning pagsuwat, wa gihapon makatuo si Sanchez nga nakaduol siya kang Duterte, nahatagan siya og libro ug kahigayunan nga maka-selfie.
Si Duterte maoy guest of honor sa kasaulogan sa ika-49 nga kasumaran sa Charter Day sa Mandaue niadtong adlawa.
Sa iyang paghulagway, si Sanchez nagkanayon nga ang iyang gibati susama sa bata nga natuman ang pangandoy human sa hitabo.
“Bahala nalang og dili ko makaduol nimo Mr. President basta ang importante, thank you for coming and visiting
Mandaue City,” kini maoy gipamulong ni Sanchez sa iyang live video sa pag-abot pa lang ni Duterte sa City Cultural and Sports Complex. Libro ug Selfie
Samtang namulong ang Presidente, wa gyud wagtanga ni Sanchez iyang panan-aw niini, nakatutok sab siya sa mga gipanglitok sa Presidente.
Sa may katapusang bahin sa taas nga yawyaw ni Duterte, nangutana kini kon kinsay gusto mobasa sa iyang gidala nga libro.
Ang librong “Altar of Secrets: Sex, Politics, and Money of the Philippine Catholic Church” ni Aries C. Rufo maoy gihimong tamdanan sa Presidente sa iyang pagpangatake sa simbahan sa tunga-tungang bahin sa iyang pakigpulong.
Sud sa maong libro mao ang mga sekreto ug eskandalo sa simbahang Katoliko sa nasud.
Wa gibutang ni Sanchez, kinsa naglingkod sa atubangan sa stage niadtong higayuna, iyang kamot hangtod nga nakit-an sa Presidente iyan pagwara-wara.
“Iyaha nang gitunol ang libro nako. So pagtunol niya sa libro, nibarog dayon ko. Sakit kaayo akong tuhod ato, nibarog ko, nagduhaduha kog lakaw sa stage kay I know naay PSG di dayon ta kaduol sa Presidente. Niya mura man og gitagaan ko’g go signal sa PSG nga
‘Okay, go ahead.’ Maong nisaka gyud ko nadawat nako ang libro,” ni Sanchez sa dihang nahinabi ning mantalaan.
Pagsaka pa lang sa konsehal sa stage, giabibahan na kini sa mga nitambong sa kalihukan human siya komedyang gipangutana ni Duterte: Pari na niadto? Seminarista ka no?
“Wa ko kapasar, Mr. President,” pasiak nga tubag ni Sanchez ni Duterte ug nisamot ang agik-ik sa mga tawo.
“Mayra gyud. That (ang libro) is too revealing ha, I’m
warning you. If mahutdan kag options, naa may bagong relihiyon karon. Iglesia ni Duterte,’ komedya sa presidente nga nakapabahakhak og samot sa mga nitambong.
Human niya madawat ang libro, nihangyo dayon siya og selfie uban sa Presidente nga way libog ug nisugot ra dayon.
Giangkon ni Sanchez nga di man kini maanindot nga selfie uban sa presidente, apan sangko sa langit iyang kalipay.
Ang tibuok panagtagbo nahitabo sud lang sa usa ka minuto.
“Wa gyud ko kasabot sa akong feeling ba nga mura kog na-stun, mao ni mao na. At the end of the day, happy ko nga na- proud kay once in a lifetime ra baya na mahitabo nga opportunity,” ni Sanchez ning mantalaan. /