Tinuod nga katarungan?
Human siya labhi og kasaba ni Presidente Rodrigo Duterte, si Cebu City Mayor Tomas Osmeña miluwat og pamahayag kalabot sa iyang panglawas pinaagi sa iyang Facebook page. Iyang giangkon nga moadto unta siya sa Estados Unidos alang sa usa ka medical procedure aron maalibyuhan ang iyang hernia nga resulta usab sa operasyon nga gihimo sa mga doktor alang sa iyang cancer katuigan na ang nakalabay.
Matod ni Osmeña nga wa siya molarga tungod kay di maayo ang kahimtang sa dakbayan sa Sugbo sa natad sa kalinaw ug kahusay.
Iyang gipalutaw nga sakripisyo ang iyang gihimo tungod ug alang sa mga Sugboanon.
Apan kon tan-awon, di ba mas makaayo kaniya ug sa mga Sugboanon kon magpahiling gilayon siya didto sa Amerika aron maseguro nga matagad gilayon ang kahimtang sa iyang panglawas?
Naa usab ang ubang mga opisyal, kadaghanan niini iyang tinudlo, nga nagdumala sa nagkadaiyang mga departamento sa city hall.
Naa usab ang iyang mga kaalyado ug si Bise Mayor Edgardo Labella nga dunay igo nga kabangkaagan ug kapabilidad sa pagdumala sa city hall. Makadagan na siya nilarga sa nagkadaiyang mga nasod. Maayo rang Cebu City sa pagbalik niya. Wa man magkaguliyang ang dakbayan samtang wa siya. Mabaw ra ang katarungan nga tungod sa kalinaw ug kahusay sa siyudad tungod sa sunodsunod nga mga patay kay di kini bag-o alang kaniya. Mao baya ni ang nahitabo sa usa niya ka termino.
Basin sakto tuod si Presidente Rodrigo Duterte sa iyang paghulagway kang Osmeña nga nagtuong siya ra ang nakahibawo sa tanan o kaha, duna siyay gikahadlukan.