Kasong libel
Mahulog kini nga self-serving gumikan kay ako man mismo ang nahilambigit niini. Apan ako lang kining ipahibalo sa publiko gumikan kay naglambigit man usab kini og public interest labi pa ang anaa sa media profession. Kabahin kini sa kasong libel nga gipasaka sa “kanhi laos nga pulitiko” batok kanako upat ka tuig na ang nakalabay. Kabahin kini niadtong artikulo nga akong gisuwat sa atong lindog sa SunStar Cebu niadtong Oktubre 25, 2014 diin akong gitawag nga “fabricated charges” ang pipila ka mga kaso nga iyang gisang-at batok ni kanhi City Treasurer Diwa Cuevas.
Ang “kanhi laos nga pulitiko” misang-at og 30 ka mga kasong administratiba ngadto sa Civil Service Commission ug Department of Finance nunot sa findings sa Commission on Audit (COA) nga nagpakita nga adunay mga “discrepancies” ang pag-hawid ni Cuevas sa fiscal management sa Dakbayan. Apan way anomaliya ug wa mapasaka-i og kasong kriminal si Cuevas. Akong gihulagway nga “fabricated charges” o minamao-mao aron pag-harass ni Cuevas.
Duha ka klaseng libel ang iyang gipasaka batok kanako. Libel base sa Revised Penal Code ug cyber libel gumikan kay napatik ang maong lindog sa online. Nasang-at ang sa Revised Penal Code samtang na-dismiss sa piskaliya ang cyber libel. Human masang-at sa korte nalutsan kog warrant of arrest. Apan nakapiyansa ko.
Midangop ang akong abogado sa Department of Justice pinaagi sa petition for review. Gimanduan ni kanhi DOJ Secretary Vitaliano Aguirre 111 ang City Prosecutor nga i-withdraw ang maong kaso kay walay igong basihanan. Sa ato pa, gi-dismissed ang kaso sa DOJ. Ikatulo na nga huwes si RTC Branch 18 presiding Judge Gilbert Moises kay una nang mi-inhibit sila si RTC Judges Ricky Jones Macaraya og Generosa Labra.
Sa 8 ka pahina nga desisyon ni Judge Moises, ang huwes nagkanayon nga dili libelous ang akong gisuwat kay nasubay kini sa journalistic profession ug freedom of expression.
Ika-26 na nako kining libel. Apan dismissed ang tanan. Ang libel usa sa mga risgo sa media profession. Salamat mipatigbabaw ang kamatuoran.