Pang-masa si Tingting

Managing editor na ko sa Newstime Daily niadtong napiling gobernador si Vicente “Tingting” dela Serna, usa ka pang-masa ug dili tradisyonal nga politiko.

Mao kadto ang panahon nga nausab ang prayoridad sa Kapitolyo gikan sa dinagkong mga inprastruktura padulong sa mga proyekto nga direktang makatabang sa mga kabus sama sa CDOP kun Cebu Development Outreach Project.

Mao kadtong panahona nga nahimong teritoryo sa mga nagwelgang drayber ang Kapitolyo.

Gi-presyor sab ni Tingting ang mga tag-iya og beach resort nga dili kuralon ang mga baybayon sa Sugbo labi na sa Mactan ug Bantayan aron makakaligo sab og nindot nga beach ang mga kabus.

Gani, usa sa mga direksyon sa administrasyon ni Gob. Dela Serna mao man ang 93-1 nga nagtinguhang mapanag-iya sa mga kabus nga lumolupyo ang mga yuta nga gipanag-iya sa lalawigan.

Nasiguro ko nga nalipay si Tingting nga madayon gyud kining maong proyekto human sa paglabay sa pipila ka mga dekada karong nagkasinabot na ang Syudad sa Sugbo ug ang Kapitolyo sa planong land swap.

Matinuod na gyud nga makapanag-iya ang mga kabus nga taga-dakbayan nga nagpuyo sulod sa dugayng panahon sa mga luna nga gipanag-iya sa lalawigan.

Subo lang palandungon nga usa ra ka termino si Gob. Dela Serna.

Alang kanako, dili pa andam ang mga Sugboanon sa lalawigan sa mga inisyatiba nga iyang gipahigayon niadtong 1992 ngadto sa 1995.

Subo sab palandungon nga di na sab makabalik si Tingting sa politika. Namatay siya sa miaging gabii tungod sa kanser sa baga.

Good bye, Ting. Bisan pa man, nasiguro ko nga buhi ka diha sa dughan sa daghang mga kabus nga Sugboanon.

NAGA

Usa sa aktibo kaniadto sa CDOP ni Gob. Dela Serna mao ang usa ka Val Chiong. Mao nga dihang nahimo kining bise mayor ug mayor sa Naga, wala ko mahibulong nga nahimong progresibo ang maong syudad.

Ug makita nato ang dakong kausaban sa Syudad kada tuig matag agi nato padulong sa habagatang bahin sa Lalawigan sa Sugbo.

Sa pagkakaron, nahimo nang destinasyon ang Naga tungod sa sports ug ang maanindot nga plaza niini.

Ug pagkahuman sa tulo ka termino ni Mayor Val, abtik sab nga nakasunod ug nipalambo ang iyang anak nga si Mayor Kristine Chiong.

Imbitahon ko kamo sa pagbisita sa Naga karong nag-angat ug sa adlaw mismo sa Charter Day sa Sept. 5.

Dayon atong nasayran karong bag-o nga nianunsyo na si Mayor Val nga modagan siya ug mobalik isip mayor. Apan dakong pangutana kon unsay plano ni Mayor Kristine? Di ba kaha bise gobernadora?