“Kahiladman”
Binasi sa Deuteronomio 4:1-2, 6-8; Salmo 15; Santiago 1:17-18, 21-22, 27; Marcos 7:18, 14-15, 21-23
Sagad makakita sa ginhawaan sa tawo mao ang doktor o embalsamador. Apan kitang tanan makakita sa kahiladman sa tawo bisag buhi pa siya. Ang anaa sa kahiladman man god mapadayag sa mga pulong o bulohaton sa usa ka tawo. Lisod tagoan, pananglit, ang kaligotgot nga gibitbit sa usa ka tawo. Motumaw gyod ni sa ilong nga naglisngag sa kalagot o sa mga pulong nga hait. Ang tawo nga nawad-an og paglaom mabutyag pod diha sa iyang pagkawalay umoy o sa mga pulong nga walay kinabuhi. Hinuon kon gikapoy tungod kay kuwang og katulog, mawad-an pod og kinabuhi ang mga pulong.
May giatubang nga kahimtang si Jesus nga nagagikan sa tradisyon sa mga Judio sa pagpanghugas sa ilang mga kamot usa mokaon. Dili kini mahitungod sa pisikal nga kalimpiyo kun “hygiene”. Mahitungod kini sa gitawag nga ritwal nga paglimpiyo. Ang mga kamot ug mga bitiis man god sa mga Judio mabulingan sa abog gikan sa dalan nga giagian usab sa mga pagano. Tungod kay linahi man ang mga Judio tungod sa ilang pagkapinili sa Dios, ang maong abog daw nakapatakod nila sa kahugaw sa mga pagano nga mga dili linahi.
Taastaas ang lista sa mga angay limpiyohanan sa mga Judio. Misulti si Jesus: “Walay butang nga anaa sa gawas sa tawo nga sa pagsulod niini nganha kaniya makahugaw kaniya, apan ang mga butang nga mogawas sa tawo mao ang makahugaw sa tawo.” Gawas sa hugaw mogawas sa lawas sa tawo nga pisikal, may mga kinaiya, pagbati, ug panghunahuna nga tinuorayng makapahugaw: “... mga pakighilawas, mga pagpangawat, mga pagpatay, mga pagpanapaw, mga kahakog, mga kadaotan, panglimbong, kalaw-ay, kasina, pagpasipala, pagpagarbo, pagbinuang.” Kini sila makapahugaw kay dinhi magsugod ang mga hiwi nga bulohaton.
Sukwahi sa maong mga hiwing kinaiya ang mga sugo sa Dios. Ang pagpatuo ug pagbuhat sa maong mga sugo timailhan sa kinaadman nga anaa sa kasingkasing sa tawo. Kon kini maoy nagdumala sa kahiladman sa katawhan sa usa ka nasod, makiangayon ug tarong usab ang ilang pagdumala sa yuta nga ilang gipuy-an ug sa katilingban nga ilang gilangkob, sumala sa Deuteronomio. Walay angay “idugang” o “kuhaon” sa maong kasugoan.
Mao nga “mapaubsanong dawata ang pulong nga gitanom diha kaninyo nga mahimong moluwas sa inyong mga kalag,” sumala ni Santiago. Kay ang “tanang maayong gihatag ug ang matag hingpit nga gasa gikan sa kahitas-an, nikanaog gikan sa Amahan sa mga kahayag.”
Matag adlaw diay kinahanglan kita maghimog husay sa tanang mga gasa nga atong nadawat gikan sa Ginoo, lakip na ang atong kinabuhi, mga personal nga relasyon sa banay ug sa atong kahigalaan, mga kabtangan, ug mga higayon nga gihatag kanato sa Ginoo nga magtinarong ug magbuhat sa matarong.