Skateboard sa dan

Niadtong Sabado sa gabii, samtang nagsubay mi sa karsada atubangan sa University of San Carlos- Talamban campus, nakaligis mi og usa ka skateboard nga gigamit sa usa ka 15 anyos nga lalake.Pwerte nakong balanse aron di matumba ang scooter.

Ang 15 anyos nga tag-iya ug mga kauban daling ningduol ug nangayog pasaylo. Di unta namo ihatag ang scooter, apan nagpakiluoy.

Nangatarungan siya nga natumba sab siya sa elevated sidewalk sa USC.

Amo silang gipasabot nga bisan unsa pa, ang sidewalk, labina sa main highway, di duwaanan kay kuyaw silang madisgrasya o makaigo og laing tawo, nga maoy nahitabo namo.

Pwerteng hadluka sa akong asawa sa hitabo. Maayo na lang way sakyanan nga nagsunod, wa mi mangatumba.

Ako lang klaruhon, di ko supak sa skateboarding. Apan di ni angay himuon sa busy nga mga sidewalk ug daplin sa highway nga daghan og mga sakyanan nga mangagi.

Naa may mga lugar nga mingaw. Kon di man gani, sa mga gym sa barangay.

WAY PADULNGAN

Nganong way mga imprastraktura alang sa sports, except anang alang sa basketball ug tennis? Tungod kay ang atoang mga pulitiko kaugalingon ray gihuna-huna.

Abi kay popular man ug mas daghan ang makapahimus sa basketball courts, mao ra gyud ni ang gi concentrate sa politicians.

Sa ato pa, botos ang ilang giapas. Kaanindot man unta kon dunay specialized nga mga sports infrastructure alang sa skateboarding, kapraktisan sa mga hilig og BMX ug uban pang sports nga duna tay purohan nga mo-excel ta sa world stage.

Sa skateboarding, biseklita ug uban pang sports, makatupong man ta sa mga maayong lake sa kalibutan. Kani unta ang hatagan usab og pagtagad.

The more facilities nga tukoron, mas daghan kitang madiskobrehan nga potential.

Nganong ang ubang mga nasod nga gagmay pa sa Pilipinas makalabaw pa man nato, sama sa Singapore? Tungod kay mao kini ang ilang gilantaw.

BIKE LANE

Sa Guangzhou City, China, dunay bike lanes sa ilang mga karsada bisan sama ka gamay sa atoa. Unya ang mga sakyanan ug pedestrian nagtahod ani. Bisan gani ang electric buses di moagi sa lane.

Di lapad ang bike lanes, igo rang matungtungan sa mga biseklitang magdagan sa karsada.

Wa sab nila ilakip ang biseklita sa traffic laws.

Makakita kag mga biseklita nga mag crisscross sa karsada.

Kon nahimo kini sa China, nganong di man sa atoa?

Wa ni mahimo tungod kay ang mga pulitiko wa maghuna-huna niini. O nahadlok sa negatibong reaction sa public.

Apan nganong di man eksperimentuhan o suwayan, di ba? Tungod kay kadaghanan sa mga opisyal sa kagamhanan mubo og panglantaw.

Makaguol. Igo ra ta sa pagpanghupaw human magtagawtaw.