By your side

Nagpasugat si Arnel nako sa airport. Naghinam-hinam ko nga makakita niya. Personal ko siyang pahalipayan sa iyang pagdaog sa single tennis tournament didto sa Manila. Dihang misulod na siya sa arrival area, nagdali kong misugat niya.

Migakos ko kang Arnel. Migakos sab siya nako.

“Congratulatons, Nel.” Nindot kaayo kog smile.

Mao sab ang akong boyfriend, morag naggikan gyud sa iyang kasingkasing ang gibating kalipay, nakita ko kini sa iyang pinahiyoman. “Thank you, Jean.” Pagka gabii, namisita si Arnel nako. Nagtupad mig lingkod sa taas ng sopa. Nanulod na sa ilang kuwarto sila si Mama ug Papa, ingon man ang akong igsuon misulod na sab sa among kuwarto. Usa ra ang kuwarto namo ug ang akong manghod apan tagsa mig kama.

Misandig ko sa dughan ni Armel. Migakos siya nako.

“Sa didto ka pa sa Manila, Nel, dunay nahitabo nako.”

Nakadesisyon ko nga sultihan ang akong boyfriend sa hapit nako pagkalumos, ug si Carlo ang nagluwas nako. Pagkahuman kog sugid kaniya sa tanan, mitarong kog lingkod. Gitan-aw ko si Arnel aron susihon ang iyang reaksiyon.

Mitan-aw siyag dugay nako. Seryuso kaayo siya.

“Wa ka ba malipay, Nel, nga wa ko mamatay?”

“Nalipay man! Sige, ha, mopauli na ko!”

Sa nawong sa akong boyfriend klaro nga nasuko siya. Wa ko makatingog kay first time pa kong nakamatikod nga nasuko siya nako. Pinabundak pa gani ang iyang tingog. Igo ko na lang siyang gisundan sa pagtan-aw nga nagdaling migawas sa sala.

“Nangabubho si Arnel?” Hilom kong nakaingon.

Gitawgan ko siya sa selpon apan wa gyud siya motubag nako. Hapit nagbuntag nga wa koy tarong nga katulog. Naguol ko. Seluso diay ang akong boyfriend. Klaro nga nagselos siya kay gisultihan ko man siya nga gisupsop ni Carlo ang nainom kong daghang tubig-dagat pinaagi sa ngabil aron mogawas kini.

Nalipay ko kay namisita si Arnel nako usa ka gabii ana. Apan mao gihapon, wa siyay kadasig nga nakig-estorya nako.

“Naunsa ka ba, Arnel? Way malisya tong paghawok ni Carlo nako sa lips, uy!” Morag naglagot na ko. “Igo lang ko niyang giluwas aron di ko mmatay!”

Apan nasuta nako nga wa gyud malipay si Arnel sa gibuhat ni Carlo nako.