Ang asawa ni Treddy

Si Treddy officemate nako sa kompaniya nga among gialagaran. Dili siya ambungan apan macho ang iyang pamayhon kay may panahon man siya nga gigahin para bisitahon ang suki niyang gym. Pulos mi CPA. Siya materials traffic controldept, manager (MTCD); ako,inventory accountant. Konektado kaayo ang among mga trabaho.

Bisan ingnon ta nga ordinaryo ra ang panagway ni Treddy nga masaypan gani nga drayber sa dyip pasaheroan kay tabunon ang iyang pamanit, guwapa kaayo ang iyang asawa, si Almie. Ang kaanyag ni Almie ikatandi sa kang Bea Alonzo, hasta ang ka-seksi niini ug ang kaputi ug ka-is-is sa pamanit nga hamis. Gani daghang mga lalaki namong kauban nangaibog kang Almie, lakip na ang mga minyo. Usa ako sa naibog kang Almie, bisan minyo na ko ug matahom sab si Ellen, akong asawa. Sila

Suod ming managhigala si Treddy. Karon ug unya imbitahon ko niya nga adto manihapon sa ila, sa Guadalupe. Mag-inom mi’g beer. Sa maong mga okasyon nagkasuod kami si Almie. Way paghikap sa kaugalingong balhibo, guwapo pod baya ko. Look-alike ko ni Jericho Rosales. Sa mga higayon nga adto ko makapanihapon sa ilang Treddy, mabantayan nako si Almie nga dulot kaayong motutok nako nga nuntan niya’g tam-is nga pahiyom. Mora’g nakagusto siya nako.

Dihay usa ka gabii nga nahiuli ko sa amo, sa Cogon-Ramos, gikan sa ilang Treddy mitunog ang akong selpon. Naghigda na ko sa kama. Incoming call gikan ni Almie. Naatol kadto nga wala diha ang akong asawa ug duha ka anak kay namista sa Nayawak, lugar nga natawhan namong Ellen.

“Hai, Ken!” matod ni Almie. “Almie, you called. What’s up?” mitubag ko.

“Ki-kining, Ken, di man ko makatug. Pwede magkita ta. Alas diyes pa man sa gabii,” hagawhaw ni Almie. Nakalitan ko ning pagtawag ni Almie karon. Mikuba-kuba ang akong dughan.

“Du-duna kay problema? Hain si Treddy?” matod ko.

“Tua, ay, sa among kuwarto, naghagok sa kahubog,” ni Almie. “Sige na, Ken, magkita ta. Duna koy isulti nimo. Importante kaayo.” Paraygon ang tuno sa tingog ni Almie nga milukmay sa akong balatian. Daghan ang nainom nga beer ni Treddy kaysa akoa.

“O sige, Asa ta magkita?” matod ko.

“Diha lang sa Mango Square, sa Handuraw,” ni Almie. “Mag-taksi lang ko.”

“Okey!” Mitimbakuwas ko ug dali nga nag-ilis.

Akoy nahauna pag-abot sa Handuraw. Milingkod ko sa usa lamesa nga nasuok. Unya nahiabot si Almie nga nag-shorts og maong ug nagsul-ob og itom nga blawos. Seksi gyod kaayo siya. Misamot ang akong kaibog kaniya. Milingkod siya sa akong atbang. Gipangutana ko siya unsay iyang gustong imnon. “Beer lang,” tubag niya. Mi-order kog duha ka SanMig light sa weyter. Ako siyang gipangutana bahin sa importante nga butang nga iyang giingon kaganina. Mihagawhaw siya apan klaro kaayo sa akong pandungog ang iyang mga pulong. “Wa ka magtiaw, Almie?” matod ko. “Wa, Ken. Gusto ko nga maguban ta karong gabhiona. Sa pagka tinuod, guwapo ka, mayong ni Jericho Rosales, ug in love ko nimo!” prangka niyang tubag. Gikan sa Mango Square didto mi sangko sa usa ka motel nga nahimutang sa Mabolo. Nahumpay ang kaibog ko kang Almie, ang maanyag nga asawa ni Treddy.

Tulin nga nanglabay ang mga adlaw. Usa ka gabii giimbitar na pod ko ni Treddy nga adto manihapon sa ilang balay. Nabatyagan nako nga wala si Almie. Ang katabang ray mitagad kanamo. Didto nagtagay mi.

“Treddy, asa diay si Almie?” matod ko. Gipunit niya ang iyang selpon gikan sa lamesa. Iyang gi-open ang inbox ug gipabasa kanako ang teks ni Almie tulo ka adlaw na ang nakalabay. “Sorry kaayo, Treddy! Mikuyog ko kang Gardo, atong silingan nga negosyante nga dugay nang na-in love nako. In love sab ko niya kay guwapo siya; kamay-ong ni Robin Padilla. Adto na mi sa Davao puyo. Ikaw na lay bahala kang Inday Chloe! Pasayloa ko! Almie.”

Naluoy ko nga nagtan-aw kang Treddy nga miipis og beer sa iyang ‘mug’ ug giyarok kausa nga nagpiyong. Ug nahinumdom ko namo ni Almie usa ka gabii niana nga nagminahalay sulod sa usa ka lawak sa motel. (KATAPUSAN)