Olympic gold sunod nga misyon ni Hidilyn Diaz
Human nagmalampuson paghagdaw sa unang gold sa Pilipinas sa 2018 Asian Games weightlifting event sa Jakarta, Indonesia, si Hidilyn Diaz nagtinguha nga makabaton sab siya og bulawan sa 2020 Tokyo Olympics.
Mao kini ang iyang gibutyag atol sa iyang pagbisita sa mga opisyal ug kabataan sa The Sisters Mary School Boys Town sa Brgy. Tungkop, lungod sa Minglanilla kagahapon sa buntag.
Sa iyang pamahayag, gihisgutan ni Diaz ang iyang mga kaagi ug gihimo nga pagpangandam alang sa Asian Games ug matod pa niya nga dili kini sayon.
“Sobrang hirap talaga ng training na dinaanan ko. I train everyday, six times a week, puro barbel lang ang hinahawakan ko. Ang dami kung gustong kainin…. cake, coke, french fries, lahat yan gusto ko pero ginive-up ko kasi gusto kong manalo,” asoy ni Diaz.
Giangkon usab niya nga na-pressure siya sa Asian Games tungod sa kataas sa expektasyon sa mga tawo ngadto kaniya. Apan matod pa niya nga iya na lang gitugyan ug giampo sa Ginoo ang tanan aron nga siya magmalampuson.
Gipasabot ni Diaz nga dili basta-basta nga kompetisyon ang iyang salmutan sa Tokyo Olympics tungod kay daghan usab siyang makontra nga puros kusgan ug kinahanglan pa niyang moagi og unom ka qualifying events una makakuha og luna sa matag upat ka mga tuig nga kompetisyon.
“Please pray for me guys. Kasi sobrang hirap pa kasi ng dadaan ko before makapag-Olympics. So, I need your prayers and kakayanin ko to,” batbat ni Diaz.
Giawhag usab ni Diaz ang kapin sa 2,000 ka mga kabataan sa SMS Boystown nga mosalmot sa weightlifting ilabi na karon nga opisyal na nga moapil ang maong tunghaan sa Cebu School Athletics Foundation Incorporation (CESAFI).
Sa wala pa nahuman ang maong programa, pormal na nga nagpinirmahay sa memorandom of agreement (MOA) ang Sisters of Mary School, pinangulohan ni Sr. Emelan Lee, SM ug CESAFI Commissioner Felix Tiukinhoy Jr.
Matod ni Tiukinhoy nga napili ang SMS Boystown isip bag-ong kuponan sa CESAFI tungod sa kadaghan ani nga mga tinun-an nga aktibo sa natad sa paugnat sa kusog.
“There are lots of potential talents nga atong makuha ani gikan kanila. Not only in sports, but also in academic and cultural activites.” pasabot ni Tiukinhoy.
Ang Cebu Weightlifting Association (CWA) milusad sa ilang grassroots program sa Sisters of Mary gumikan kay sa dili pa lang dugay, na-aprubahan na man sa CESAFI board ang weightlifting isip usa ka sports nga pagasalmotan sa maong tinuig nga kompetisyon.
“Kung kaya ko, kaya niyo. Kaya, dream high!’ bilin pa ni Diaz sa mga tinun-an sa SMS Boystown.