21 ka mga barangay apil sa Consolacion basketball

Kapin sa 100 ka mga basketbolista gikan sa nagkadaiyang mga barangay sa lungsod sa Consolacion, Cebu ang magtigi sa 8th Mayor Teresa “Nene” P. Alegado Fiesta Basketball League nga sugdan karong adlawa sa Consolacion Sports Complex.

Ang torneyo, nga tipik sa kasaulogan sa umaabot nga piyesta sa lungsod nga pahinungod sa ilang mahal nga patron San Narciso karong Oktubre 29, opisyal nga sugdan pinaagi sa tradisyunal nga parada sa alas 2:00 ang takna sa hapon.

Ang mga kategoriya mao ang midget (17-under), SK (21-under) ug seniors ug ang gikaintapang open division.

Sa open division, unom ka teams ang magsangka ug kini mao ang David Justin Trucking, Boss KTV, L and T, Dongs Motorparts, Branz All Friends, ug GDM Marketing.

Dul-an sa P300,000 ang kinatibuk-ang mga ganti sa open category. Ang kampiyon makabaton og P50,000, makabulsa og P20,000 ang 2nd placer ug P10,000 sa 3rd placer.

Ang open division maoy labing giatangan sa torneyo gumikan kay manuwa niini ang kanhi varsity ug commercial players nga lumad nga taga Consolacion.

Nagpaluyo sa torneyo ang Consolacion local government unit ubos sa pagpangulo nila ni Mayor Nene Alegado ug Vice Mayor Aurelio Damole.

Si Liga ng mga Barangay President Wesley Alimoren maoy sports committee chairman inabagan nila ni SB members Marilou P. Casul, Victor Maglasang, Boy Tibon, Alfie Ouano ug SK Federation President Carlos Donn Flores isip mga co-chairperson. N a g dumala sa torneyo isip komisyoner mao si Paul Alelu Q. Flores, kinsa kanhi kauban ni Philippine Basketball Association (PBA) superstar Arwind Santos sa Far Eastern University (FEU) Tamaraws sa UAAP.

Motabang kang Flores sa pagpadagan sa torneyo si technical committee chief Aurelio Eslawan.