14 ka mga players giimbitar ni Guiao
Napulo’g upat ka mga magduduwa ang giimbitar ni national coach Yeng Guiao aron mosalmot sa praktis sa Gilas Pilipinas karong adlawa alang sa kampanya niini sa sunod nga tipik sa FIBA World Cup Asian qualifiers.
Sa mga sakop sa Team Pilipinas nga ningsakmit sa ikalimang luna sa bag-uhay lang nahuman nga Asian Games sa Jakarta, Indonesia, walo ang gipabilin ni Guiao.
Kini mao sila si Beau Belga, Raymond Almazan, Gabe Norwood, Stanley Pringle, Poy Erram, Christian Standhardinger, Asi Taulava, ug Paul Lee.
Natangtang gikan sa Asiad squad mao sila si Chris Tiu, Maverick Ahanmisi ug James Yap lakip na ang magduduwa sa National Basketball Association (NBA) nga si Jordan Clarkson, kinsa kinahanglan nang mobalik sa Amerika alang sa training camp sa Cleveland Cavaliers.
Giimbitar sab ni Guiao sila si Alex Cabagnot ug Marcio Lassiter sa San Miguel Beermen, Scottie Thompson sa Ginebra Gin Kings, Ian Sangalang sa Magnolia Hotshots ug Allein Maliksi sa Blackwater Elite.
Ang Gilas gikatakdang mosulong sa Iran karong Septiyembre 13 dayon mo-host sa Qatar karong Septiyembre 17.
Giimbitar sab ni Guiao si Phoenix Fuel Masters gunner Matthew Wright gumikan kay usa ra man ka adlaw ang suspensyon niini sa FIBA tungod sa pagkahilambigit niini sa karambola tali sa Gilas Pilipinas ug Australia Boomers niadtong Hulyo.
Nagpasabot lang kini nga puwede nang makaduwa si Wright sa duwa sa Gilas batok Qatar.
Gikasurpresa nga wala imbitaha ni Guiao ang 7-footer sa Ginebra nga si Greg Slaughter, kinsa iyang nahisgutan sa sayong mga interbyu.
Hinuon gipasabot ni Guiao nga wala pa’y kaseguroan ang tanan kabahin sa iyang mga gipang-imbitar.
“Hindi pa automatic ‘yan dahil ang mangyayari nyan, let’s see who is committed by Monday. It’s still a decision that is made by the players themselves. We just invited them. We don’t know who is going to answer that invitation,” matod ni Guiao sa interbyu sa Spin.ph./