LALAKE NAMATO, NAPATAY SA PULIS

Patay ang usa ka lalake nga gituohang adunay depirensya sa pangisip human napusilan makaduha ka higayon sa pulis nga iyang gibato makaduha sa may dan Escario, Barangay Camputhaw, Dakbayan sa Sugbo.

Ang pulis nga sakop sa Abellana Police Station niresponde sa alarma nga dunay lalakeng namato sa mga sakyanan mga ala 1:45 sa hapon.

Dali nga giparesponde si PO1 Berlino Recart nga nag beat patrol sa dan Escario.

Sa iyang pag-abot, siya nipaila nga pulis, apan gilabay siya og bato.

Ang mao nga lalake giila nga si Susanito Ellana, lumad nga taga Iloilo, apan nagpuyo sa dakbayan sa Talisay uban sa iyang anak.

Naigo si Recart sa tiil hinungdan nga iya ning gipasalbahan, apan wa gihapon mopatuo.

Nikuha pa kinig dako nga bato ug subling gilabay si Ricafort, kinsa naigo sa ulo.

Nakakita ang duha ka mga Angkas driver nga sila si Francis Belecario, taga Bliis Labangon, ug laing tulo ka mga tawo, ilang gitabangan si Ricafort.

Ilang gibunalan si Ellana sa ilang helmet dihang ilang nakita ang pulis nga nalipong pa sa iyang samad.

Giingong nidasdas gihapon si Ellana hinungdan nga gipusil siya ni Ricarfort.

Bisan samdan, wa gihapon kini mopatuo, giingong nidasdas pa kini hinungdan nga gipusil sa pulis tumong sa tiyan.

Gidala si Ellana sa tambalanan, apan namatay sa iyang samad.