Pulis 'mitabon' sa kaso ni Skyler, gikiha sa NBI

Opisyal ug laing duha ka mga pulis sa Carbon Police Station gipasakaan og mga kasong criminal ug administratiba ngadto sa Ombudsman for the Military and Other Law Enforcement Offices (MOLEO).

Kini subay sa kamatayon sa bata nga si Bladen Skyler Abatayo, 4, niadtong Hulyo 10 karong tuiga.

Nasuta sa crime scene reconstruction sa National Bureau of Investigation nga usa ka pulis ang nakapabuto sa iyang armas ug dili ang usa sa mga subject sa giingong anti-drug operation, nga maoy unang pangangkon sa Carbon police.

Hingpit nang gitak-upan sa NBI 7 sa miaging semana ang ilang imbestigasyon sa kamatayon sa bata sa Sitio Bato, Barangay Ermita, dakbayan sa Sugbo.

Ang NBI nihimo sa imbestigasyon human nidangop kanila ang mga ginikanan sa biktima nunot usab sa managlahi nga bersiyon sa nahitabo atol sa giingong police operation.

Niadtong Agosto 28, naduso na usab ngadto sa Ombudsman MOLEO pinaagi sa Ombudsman Visayas ang mga kasong criminal ug administratiba.

Ang hepe sa Carbon Police nga si Senior Inspector John Kareen Escober gipasakaan og reklamong falsification by a public officer, dereliction of duty, obstruction of justice ug grave misconduct.

Samtang ang mga sakop niya nga sila si PO1 Wilbert Perez gikiha og reckless Imprudence resulting to homicide ug grave misconduct, human masuta nga siya maoy nakapabuto ug armas nga maoy nakaingon sa kamatayon ni Skyler.

Laing sakop sa Carbon Police nga si PO1 Rey Van Dedula gipasakaan sab og mga kasong deriliction of duty ug grave misconduct.

Base sa undated police operation report ni Escober, nga nakuha usab sa inahan ni Skyler, ang nahitabo sa bata bunga sa usa ka lehitimo nga police operation.

Sa susamang report, gipadayag niya, nga usa sa mga subject sa operasyon maoy nakapabuto og armas, di pulis ang nakahimo niini.

GITABUNAN

Sa siyam ka pahina nga reklamo, gitumbok sa NBI nga nihimo ug “cover story” o cover up ang kapulisan aron pagtago sa tinuoray nga nahitabo.

Ang NBI nakakuha og pinanumpaang mga pamahayag sa pipila ka mga saksi, mga footage gikan sa closed-circuit television (CCTV) ug nihimo sab og crime scene reconstruction aron mopalig-on sa gisang-at nila nga kaso.

Gitugyan na ni NBI 7 officerin-charge Dominador Cimafranca ang kaso ngadto sa Ombudsman alang sa pagpahigayon og preliminary investigation.

MITAKDO

Sa incident scene reconstruction nga gihimo ni NBI 7 Medical Legel Officer Dr. Rene Cam ug sa forensic illustrator nga si Ligaya Banawan, nasuta nga ang gigikanan sa bala nga niigo sa bata gikan sa ubos padung sa taas.

Nitakdo kini sa pamahayag sa usa ka saksi nga naligas si Perez ug aksidente nga nakapabuto sa iyang armas sa dihang nabuwasot.

Ang bala niigo sa dughan ni Skyler, nga niadtong higayuna, nagduwa sa ikaduhang andana sa ilang balay.

“The measurements conducted on the bullet entry, bullet exit and the shooter’s line of sight coincided with the relative position of PO1 Wilbert Perez as he slipped going down the dilapidated wooden steps of the stairs of the abandoned house as he accidentally fired his gun as he was falling to the ground,” dugang sa reklamo.

Nasuta usab sa imbestigasyon sa NBI nga walay gihimo nga koordinasyon ang kapulisan sa Philippine Drug Enforcement Agency (PDEA) 7 ug sa barangay alang sa pagpahigayon sa police operation niadtong adlawa.

Wa usab sa listahan sa PDEA sa mga drug personality ang amahan ni Skyler nga si Marc.

Gipatawag unta sa NBI ang mga pulis nga nalambigit sa operasyon aron kuhaan sa ilang habig, apan wala sila motunga.

Giangkon sab sa ahensiya nga naglisud sila sa imbestigasyon tungod sa pagdumili sa kapulisan sa paghatag kanila sa pipila ka mga physical ug documentary evidence tungod usab sa giingong “PNP administrative protocols”.

Masaligon si Cimafranca nga di maapektohan ang relasyon sa NBI ug kapulisan niining pagpasaka nila og kaso batok sa pipila ka mga sakop sa Carbon Police.

MOATUBANG

Andam hinuon nga atubangon ni Escober ang mga reklamo batok kaniya ug sa iyang mga sakop.

Iya usab i-refer ang maong hisgutanan ngadto sa iyang mga labaw nga mao silang Sr. Supt. Royina Garma sa Cebu City Police Office ug Chief Supt. Debold Sinas sa Police Regional Office 7.

“Oo, Ma’am kay legal man na. Mangayo pud ko sa ilang (Garma’s and Sinas’) guidance ana, Ma’am,” niingon si Escober.

Matod niya nga wa pa silay abogado, apan ang Police Regional Office (PRO) nisaad nga mohatag sila og legal assistance.

Sa iyang bahin, nagpasalamat ang amahan ni Skyler nga si Marc nga hinay-hinay na nilang nakab-ot ang hustisya.

Ang pamilya nihawa na sa Ermita sa tinguha nga magpuyo na nga malinawon.

Giangkon hinuon ni Marc nga nibati siya ug kahadlok karon ilabi na nga mga pulis maoy gikiha subay sa kamatayon sa iyang anak. /

The storyline that one of the male companions of the suspects pulled out a gun and fired a shot at the police officers is a fabricated story which has no leg to stand on under attending circumstances.”

- tipik sa reklamo sa NBI ngadto sa Ombudsman.