DAKONG KOOP IPASUSI SA BIR
Kanhi Capitol consultant on jail matters, Byron Garcia, nihangyo sa Bureau of Internal Revenue (BIR) nga imbestigahon ang giingong wa pagdeklarar sa pipila ka mga opisyal sa Cebu CFI Community Cooperative sa P18 milyones nga kwarta sa iyang inahan, si anhing Judge Esperanza Garcia, ang founder sa kooperatiba.
Apan si kanhi deputy speaker Pablo Garcia, chairman sa maong kooperatiba ug iyang amahan, nasubo sa gibuhat sa iyang ikalimang anak.
“It is unfortunate that we have a black sheep in the family whose greed for money has overcome his filial duties to his
father,” tipik sa pamahayag gikan sa buhatan sa kanhi kongresista nga nadawat sa Superbalita Cebu kagahapon.
Sa iyang suwat ngadto sa district collector sa Revenue District Office No. 82 sa BIR Cebu City South pinetsahan og Septiyembre 3, 2018, si Byron niasoy nga wala sila pahibaw-a sa chief executive officer sa CFI nga si Ophelia Morales dihang namatay ang ilang inahan nga duna kini kapin kun kuwang P18 milyones nga kwarta sa kooperatiba.
“Rather, we were told that my mother had left behind a small amount only as reflected in her last account balance dated February 2016. Had we have known of that money (P18 million), we would have included that in the computation of the estate tax,” nagkanayon si Byron sa iyang suwat nga personal niya gihatod sa nahisgutang buhatan sa BIR sa siyudad sa Sugbo.
Wa si Atty. Maglangit Decampong, district collector, dihang gihatod niini ang suwat kay duna kini gitambungan nga seminar, apan gidawat kini sa usa sa iyang mga staff.
Matod ni Byron, nagsuwat siya sa BIR aron pahibaw-on sa sirkumstanya kon nganong naa siyay P931,000 nga kwarta nga iyang bahin sa giingong kwarta sa iyang inahan nga madeklarar sa BIR.
“Unya mahadlok ko ba basin kami unya maoy makihaan ani og tax evasion, dili ra ba silang mga senior manager. So, mao nang I want to clear my name aning kwartaha sa BIR, so, nang naghatag kog suwat,” dugang ni Byron dihang nahinabi sa Superbalita Cebu kagahapon pinaagi sa Facebook Live.
Iyang gipakita ang duha ka tseke nga nagkantidad og P450,000 matag usa. Ang usa pinetsahan og Agusto 28, 2018 samtang ang laing usa, Septiyembre 1, 2018.
Sigon niya, may P31,000 usab nga gideposito sa iyang savings account sa CFI.
Sumala ni Byron ang P931,000 base sa iyang computation maoy 5.5 porsyento nga iyang bahin sa kinatibuk-ang P18 milyones nga bahinon nilang walo ka magsuon apil usab ang ilang amahan.
Dugang niya, gi-release dayon ang mga tseke bisan wala pa mabayari ang estate tax niini duha ka semana ang nakalabay human siya nibahad nga mokiha sa senior managers sa CFI Cooperative kabahin sa iyang madawat nga inheritance gikan sa iyang inahan.
Siya nitug-an nga mismo ang usa sa mga board of director sa CFI nga si Atty. Lito Astillero kuyog si Engr. Adolfo Quiroga ang nihatod sa mga tseke ngadto sa iyang panimalay sa dakbayan sa Talisay.
Siya namahayag nga nabalaka siya nga makihaan og tax evasion niining pagkadiskobre niya sa P18 milyones nga kwarta sa iyang inahan kay nabayran na nila ang kinatibuk-ang estate tax human mamatay ang iyang inahan niadtong Pebrero 1, 2016 uban sa extrajudicial settlement assets nga sila, ang mga manununod, ang nibayad.
Siya niangkon nga usa ka kanhi accountant sa CFI ang nagpahibawo niya sa P18 milyones nga kwarta sa iyang inahan nga giingong gitagoan ni Morales ug ubang mga opisyal sa kooperatiba.
Si Byron niawhag ni Morales ug ubang mga kaubang opisyal sa CFI nga mo-resign kon dili kaya motug-an sa tinuod.
“Mang-resign na lang sila pasayluon ta mo, pero pang-resign mo... Liman ka founder ang akong inahan sa CFI karon binoangan, gitagoan ang iyang kwarta sa mga tawo ra niya,” dugang ni Byron.
Si Morales nga gikuhaan sa iyang habig nihangyo nga dili mokomento ug ni-refer sa hisgutanan ngadto kang Pablo.
Si Byron namulong nga nagplano usab siya modangop sa Criminal Investigation and Detection Group (CIDG) sanglit nagtuo siya nga usa ka cybercrime ang pagmaniobra sa pipila ka mga opisyal sa general journals sa kooperatiba kay naglambigit kini og computer. /