Makatabang ba sa Team Rama?

Nakalitan ang Sugbo dihang kalit nga nangasaba si Presidente Rodrigo Duterte kang Mayor Tomas Osmeña. Ug kini gigamit karon sa Barug Team Rama sa ilang propaganda batok sa mayor.

Alang sa mga sakop sa oposisyon sa Syudad sa Sugbo, tapos na ang laban. Nitingog na si Presidente Duterte batok kang Osmeña.

Apan ingon ba gyud niini ang kahimtang sa politika sa Sugbo? Padayon na ba kining gipakita ni Presidente Duterte nga kasuko kang Mayor Osmeña?

Alang kanako, makaingon ko nga nausab ang sitwasyon kon mopirma na si Digong mismo og mando nga masuspenso si Tomas.

Ug kon padayon ang maong kasuko inig abot sa adlaw sa piliay sa Mayo 2014, gamiton ang kapulisan sa pagpig-ot sa makinarya sa mayor.

Apan moabot ba kaha sa ingon niini nga punto ang bangi sa presidente ug sa mayor, kon naa man. Basi man gud sa reaksyon ni Mayor Osmeña, wa siya mobira batok sa presidente.

Igo lang kining niingon nga ang gibuhiang mga pulong sa presidente mas kusog pa kay sa walop ni Sen. Manny Pacquiao.

Apan iyang gipunting nga dunay mga sayop nga impormasyon nga naabot sa presidente.

Pananglitan, nahibulong gyud ko sa usa ka pasangil ni Digong. Wala man mahitabo nga gibasol ni Mayor Osmeña ang presidente sa pagkatap sa shabu. Alang kanako, klaro nga karga kini sa mga intrigador.

Gibasol sa mayor si Presidential Assistant Mike Dino, kanhi mayor Mike Rama, ug ang PRO 7. Basi sa istorya ni Presidente Duterte, makigkita unta siya ni Mayor Osmeña apan wa kini madayon.

Atong nasayran nga ang gihangyo nga mo-arrange sa maong tigum usa ka mutual friend sa duha. Apan kini niuna og larga sa Israel.

Ug ang nag-alirong kang Digong dihang nianhi siya sa Sugbo sa miaging semana mao ang mga kaatbang sa mayor.

Buot ipasabot, dunay kahigayonan nga maklaro ang mga sumbong nga naabot sa presidente.

Kinahanglang mag-gwardiya pagmaayo si PA Dino aron di kini mahitabo.

Bisan pa man, kon magpadayon man gyud ang kasuko sa presidente, igo na ba ang mabuhat niini nga makapadaog sa Barug Team Rama?

Masimhot man karon kon asa padung ang sentimento sa mga Sugboanon.

Dayon, samtang makahatag og boto si Osmeña sa mga kandidato nga iyang suportahan, kinahanglan pang ma pruweba nga ang popularidad ni Presidente Duterte mabalhin sa laing tawo.

Hinuktokan nato ang nahitabo kang Kapitana Niña Mabatid.

Sa daghang mga eleksyon nga akong naobserbahan, mas makatabang pa sa nasyonal nga kandidato ang popular nga lokal nga opisyal.

(@anol_cebu sa Twitter)