Mapasidunggi
Nag-areglo sa Sinulog wa
Mao gyuy nisugat nako sa akong pagmata gahapon sa buntag pag-abli nako sa TV nga namatay na ang lead guitarist ug vocalist sa Hotdog nga si Rene Garcia.
Sa mga wa masayud, ang Hotdog mao gyuy labing unang banda nga nagpasikat sa OPM (Original Pilipino Music) niadtong 70s.
Wa pa nang VST and Co. ug Boyfriends, hit na kaayo ni ilang mga kanta nga Bongga Ka Day, Manila, Annie Batungbakal, Beh Buti Nga, Langit Na Naman, Ikaw ang Miss Universe ng Buhay Ko ug uban pa.
Daghan sad tingali ninyo ang wa mahibawo nga kini si Rene Garcia mao say musical arranger sa sikat kaayo natong Sinulog Theme Song (Isyagit og kusog kang nanay kini…) nga gi-composed ni Dandin Ranillo. O di ba? Karon ra mo kahibawo no?
HENYO SA MUSIKA
Si Dandin Ranillo ang mismong nitug-an nako nga si Rene Garcia ang ni-areglo sa iyang kantang Sinulog Theme Song ug hasta nang kantang “Cebu” nga puros 1980s pa namugna apan hangtod karon wa gyud `maluma.’
Naa koy koleksyon sa karaang album sa Sinulog ni Dandin sa Vicor Music ug ang nakabutang sa credit, arranged by Rene Garcia.
Mao to akong gi-chat si Dandin kon mao ba ni sa Hotdog fame. Mao gyud diay.
Dapat lang hatagan og saktong yukbo sa industriya ang namatay nga musical icon sa iyang dakong natampo di lang sa OPM, kundi hasta sa Sinulog Theme Song.
PIKAT!
Nag-red carpet premiere ang pelikulang “Goyo: Ang Batang Heneral” sa Robinsons Galleria Cebu niadtong Biyernes sa gabii nga gitambongan sa cast nga gipangulohan ni Paulo Avelino.
Pagkahuman nilag rampa, ang mga artista nibarug sa stage ug nakigtimbaya sa crowd. Ingon pa ni Avelino, “you can ask questions be it personal or about the movie.”
“Whaaat? Personal? Di kaha mosiga imong ilong?” sa ako lang hunahuna.
Di gyud ko kalimot pag-2013 sa Sinulog event nga gisingkahan ko’g pinakalit sa iyang road manager kay dili kuno mahimong mangutana og personal question. Nangutana ra gani ko bahin nila ni LJ Reyes!
Mao na iyang mga pelikula ug salida wa gyud mo-hit! Nakarma?! Haha…
“I’M HAPPY”
Wa lang hibaw-e mag-68 na diay karong Sept. 25 ang Cebuana hairdresser ug make-up artist nga si Wendy Mendoza nga nahimo nang household name sa pagpagwapa.
Si Wendy ang labing unang transgender nga niladlad sa Cebu niadtong 90s nga na-interbyu ni Korina Sanchez.
“Kaluoy sa Dios okay ra gyud ko. I’m happy. Mag-sige man ko’g exercise ug mo-service gihapon ko pero by appointment na lang sa akong parlor sa Fairview Village sa Talisay,” ni Wendy nga duna nay duha ka mga gwapang apo sa iyang anak nga si Joseph.