Hapdos nga katumanan
Nahipugwat ko dihang nasawod sa akong pandungog ang bagting sa kampana gikan sa kapilya ni San Roque, ang patron ning among barangay Talisay. GIaninaw ko ang palibot. Taudtaod na diay nga misaliid ang adlaw didto sa nagbuntaog nga bukid sa Kambunyaw, nga nahimutang sa Negros Oriental, ang atbang nga pulo habig sa kasadpan ning among lungsod sa Santander.
“Manabat ta’g pangadye sa nobenaryo ni Senyor San Roque, Bro!” agda ni Mario kanako.
Yango ra’y akong gitubag dayong tan-aw ko kang Dodong Nico, ang panganay kanamong tulo ka mga lalake. Pinaagi sa reaksyon sa iyang panagway nasuta ko nga mosabat usab siya.
Paghitangka namong tulo sa pultahan sa kapilya, tukma usab nga mao usay pagsugod sa pangadye. Gipalibot ko ang akong pananaw sa sulod human kami nakalingkod sa bakanteng lingkuranan. Daghan na kaayong mga nawong nga estranyo sa akong panan-aw. Tingali dili kini sila tal nga moupyo ning among dapit. Basi’g mga kaliwat kini sila sa mga empleyado sa Ceres Bus
Liner nga ang garahe ania nahimutang ning among baryo. Nakita ko ang duha ka Lay Minister nga silang Brod Dioni ug Konsehal Fredo. Sila na ang mipuli kang Manding Bina, ang mananabtan kaniadto nga taudtaod na usab nga gitawag sa Ginuo.
“Ang hampak sa katarungan dili unta namo hiaguman. Imo kami nga tabangan San Roque dakong bulahan!”
Miapil ko sa pagkanta sa Gozos, ug ingon sa gibayaw ako sa balaanong pununo niini. Gipangita sa akong mga mata ang gitarista nga nagduyog sa Gozos. Dili na si Noy Isko ang gitarista. Gawas nga electric guitar nay iyang gigamit, binag-o na sab ang estilo sa iyang pagkaskas.
“Sus, kapin na gyud sa baynte ka pista ni San Roque nga wala mi makapamista ug makasabat sa pangadye, Migoy!” giingnan ko silang Dionisio ug Pablo, human sa nagkayuring namong himamatay. Migoy among tawganay sa akong kahigalaan.
“Unsaong pwerte man gyung idlasa sa kuwarta didto’s Manila, Migoy!” dason ni Dodong Nico, kinsa sama kang Mario karon pa usab makauli human manimpalad didto’s kaulohan.
“Ayaw lang mo’g kabalaka kay gitaplan ko ra matag kasaulogan sa pista dinhi nga absen mo!” pasiaw ni Dionisio nga nakapabahakhak namong tanan.
Unya mao na usa’y giadto namo didto sa gawas sa kapilya ang among kaparyentehan. Mapahiyumon nga mitimbaya kanamo ang among mga ig-agaw nga silang Enrico, Ariel, Paul, ingon man si Dodong Manuel kinsa kauban ang iyang asawa nga si Inday Casiana. Diha usab si Manding ug si Nong Jess nga iyang bana.
Hilom kaming tulo samtang nanglakaw pauli sa balay diin kami magdako. Ingon og sa managsama kaming maoy gipaminaw ang diha sa sulod sa among tagsa-tagsa ka dughan. Sayod kaming dili hingpit ang kamaya ug kalipay nga among gibati karon, bisan pa man nga natuman ang dugay na among pangindahay nga makasabat sa nobenaryo ug makasaulog sa pista ni Senyor San Roque. Dili masukod ang kahapdos sa basuni nga gibilin sa among kasingkasing sa pagbiya sa dayon ni Mama Emil, ang pinangga namong inahan nga deboto ni Senyor San Roque. Nanghalang ang akong mga mata nga nahinumdom kaniya.
(KATAPUSAN)