TEPORA GUSTO SA OLYMPICS
Kon adunay oportunidad, andam si World Boxing Association (WBA) interim featherweight champion Jhack Tepora moaway alang sa 2020 Tokyo Olympics dala ang panghinaot nga siya ang labing unang makatunol sa maidlas nga gold medal alang sa Pilipinas.
“O gusto ko moaway. Basi pagbuot sa Ginuo nga ako unang makadaog og Olympic gold medal para sa Pilipinas,” matod ni Tepora sa interbyu sa Sun.Star Cebu, igsuong buhatan ning mantalaan.
Ang professional boxers gitugtan nang maka-away sa matag upat ka mga tuig nga kompetisyon gikan niadtong 2016 diin dili na mogamit og head gear ang mga boksidor.
Gipasabot ni Tepora nga nakabintaha ang professional boxers gumikan kay mas anad kini sa sakit kumpara sa ama- boxers.
Ang Pilipinas wala pa sukad nakapadala og professional boxers alang sa Olympics bisan sa Asian Games o Southeast Asian Games.
Sa miaging Rio Olympics niadtong 2016, wala pa hinuo’y professional boxer nga nagmalampuson.
Usa sa mga gikasurpresa mao ang kapakyasan ni kanhi world champion Thai Amnat Ruenroeng, kinsa nasugamak sa 3rd round TKO.
Ang 23 anyos nga si Tepora, kinsa adunay 22-0, 17KOs nga rekord isip professional boxer, anad na sab sa amateur gumikan kay kanhi kini sakop sa national team.
Nag-edad og otso si Tepora dihang nagsugod siya sa amateur rank ug nakasulod siya sa national team sa edad nga 15.
Apan nakadesisyon si Tepora nga mosaka sa professional rank alang sa iyang tinguha nga mahimong world champion.
Sa pagtuo ni Tepora nga kon wala pa siya mibiya sa amateur rank, labing seguro nakaaway na siya sa dakong kompetisyon sama sa Asian Games o kaha sa Olympics.
Sukad sa pagsalmot sa Pilipinas sa Olympics, 94 na ka mga tuig ang nakalabay, wala pa kini nakatilaw og gold medal ug usa ang boxing sa gilauman nga makatunol niini.
Duha na ka Pinoyng mga boksidor ang nakasulod sa finals nga sila si Anthony Villanueva niadtong 1964 ug Mansueto “Onyok” Velasco niadtong 1996 nakabirig sa gold medal apan napakyas ug igo lang miangkon og silver medal./EKA,