PAGSIRA SA RUNWAY SA MCIA MA-EXTEND?
Posible nga ma-extend ang pagpasira sa runway sa Mactan-Cebu International Airport (MCIA) bisan nga hingpit na unyang matapos ang asphalt overlay nga gisugdan niadtong Septiyembre 1 ug gikatakdang matapos sa Septiyembre 21. Gipasabot ni Dolorosa Yu, OIC sa airport ground operations division sa MCIA, nga ang 21 ka adlaw gitagana lang sa pag-rehabilitate sa runway apan ang center
navigational lights sa maong facility ang gikinahanglan usab nga ayuhon.
Nasayran nga niining pagtrabaho sa runway gipangtang ang 80 ka suga sa tunga sa runway aron nga dili malakip og tabon sa aspalto.
Sa higayon nga mahuman na ang pagtrabaho ibalik og taod ang maong mga suga.
Gipanglantawan nga hayan sa unang semana sa buwan sa Oktubre mabalik na kini sa normal operation.
Samtang kapin na sa 800 ka metros sa 3.3 kilometro nga runway sa maong tugpahanan ang natrabaho na, diin upat ka contractor ang gi-hire aron nga mapadali ang rehabilitation.
Gikan sa 16 ka trucks nga aspalto sa matag contractor nga ilang ibubo sa runway gihimong 20 trucks nga aspalto matag adlaw, base sa kamanduan sa general manager sa MCIA Atty. Steve Dicdican.
Matod pa ni Yu dako sab ang kahigayonan nga mahuman ang runway repair sa wa pay Septiyembre 21 kini sa higayon nga dili mabalda sa kusog nga uwan atol sa oras sa pagtrabaho gikan sa 1:30 sa kadlawon ngadto na sa 6:30 sa buntag.
Ang GMR Megawide Cebu Airport Corporation nipahibawo nga wa pa silay nasugatan nga problema sa pagpatuman sa runway closure tungod sa pagpahibawo sa matag airline
company ngadto sa ilang mga pasahero sa mahitabong time adjustment.
Ang Terminal 2 usab bukas sa ilang mga check-in counter gikan sa alas 7:00 sa gabii aron pag-atiman niadtong pasahero nga mogikan og lawom nga kagabhion o kadlawon.