Liboan nga backlog sa lisensiya masulbad na

Di kaabot og usa ka tuig gikan karon, masulbad na ang gatusan ka libo nga backlog sa driver’s license nga wa ma-imprinta sa plastic card sa Land Transportation Office (LTO) 7.

Kini ang gipadayag ni Regional Director Victor Caindec human moabli ang ilang mga temporary offsite printing office (TOPO) sa SM Sea- side City, Island Central Mall sa Lapu-Lapu ug Tagbilaran City sa lalawigan sa Bohol.

Gitug-an sa labaw sa LTO 7 nga sa pagkakaron, anaa nalang sa 380,000 ka mga driver’s license ang ilang backlog sa tibuok Central Visayas gikan sa 480,000 dihang siya nihulip sa katungdanan niadtong Enero.

“If we have 300,000 driver’s license backlog and the three TOPO’s operate at 10,000, each so that’s 30,000 a month. That means to say, we can solve that problem in 10 months from today,” paghulagway sa labaw sa LTO 7.

Matod niya nga sapagkakaron, nangita pa sila og laing lugar para maoy butangan sa ilang TOPO aron daghan og madangpan ang mga na- ghupot og driver’s license nga giimprinta lang sa papel.

Gipadayag ni Caindec nga ang ilang mga TOPO, ila usab kining himuon nga licensing centers diin mahimo nang maka-renew ug maka-apply unya sa ilang mga aplikante.

Dugang niya nga sa maong paagi, makunhoran ang mga tawo nga moadto sa LTO 7 para maglukat ug magpabag-o sa ilang lisensya nga molungtad na og lima ka tuig.

Gipahibawo usab niya nga moabli na sab unya ang ilang extension sa lungsod sa Camotes, Bantayan ug sa Medellin.