Supak ni Mike ang uban

Adunay pipila ka mga personalidad sa Barug Team Rama o Barug PDP-Laban nga dili gustong i-apil si kanhi mayor Michael Rama sa ilang lineup alang sa umaabot nga eleksiyon sa sunod tuig bisan kon mi-slide na kini nga mamahimong runningmate ni Vice Mayor Edgardo Labella. Si Labella maoy standard bearer sa pagka-mayor. Dakong supak kining maong mga personalidad nga maapil si Mike gumikan kay ilang giisip nga usa siya ka liability kanila. Liability gumikan sa iyang drug protector image. Si Rama usa sa mga gihinganlan ni Presidente Rodrigo Duterte nga narco-politician ug hangtod karon wala pa siya macleared. Kini bisan sa iyang kanunay nga panghambug sa iyang Facebook account nga nagpahulagway uban ni Duterte. Gani karon, naduhig naman ang grupo kay gihinganlan na sila sa social media nga “Team Suyop.”

Dili usab siya himuon nga

campaign manager o spokesman sa ilang grupo. Ang ilang ikatanyag ni Mike kon mo-insister man gani kini sa pagpapili mao nga gustong nilang modagan kini sa pagka-kongresista sa south district batok kang Kong. Bebot Abellanosa. Mas dako pa siya og tsansa kon magkongresista gumikan kay one on one man unya balwarte ni Mike ang south district.

Aduna man gani mipadayag nga dili na sila magpapili kon mo-insister si Mike nga moapil sa grupo. Morag mamahimong salikwaot sa Presidente nga mokampaniya sa Labella-Rama ticket nga ang tawo iyang i-kampaniya iyang gitumbok nga drug protector. Nanghambug ra ba si Mike nga si Duterte kuno maoy ilang number one

campaigner. Si kinsa man ang nagsulti niya nga mokampaniya nila si Digong?

Daghan pa kaayong resulbahon kining maong grupo. Una, wala gani sila magkasinabot sa ngalan sa ilang partido. Barug Team Rama o Barug PDP-Laban? Ang narehistro sa Comelec isip regional party mao ang Partido Barug. Ikaduha, si Labella na ang kandidato pagka-mayor sa grupo.

Aber, kinsa man ang ilang ilhon nga lider? Si Mike gihapon o si Labella na?