MAY LUWAS NA NGA BUTANE CANISTER
May solusyon na sa problema sa Department of Energy ug kapulisan kabahin sa mga butane nga ilegal nga gisudlan og liquefied petroleum gas (LPG).
Kini pinaagi sa stainless steel gas cylinders nga ibaligya sa Philippine EcoGas Producers Cooperative (PEPC) nga ilusad karong buwana.
Kon bag-o, matag usa niini nagkantidad og P285 ug kon magpa-refill kay P35 na lang ang bayaran sa konsumidor.
Pinaagi sa switching program sa PEPC tali sa DOE, hipuson ang butane canister nga ilegal nga gisudlan og LPG.
Matod ni Shiela May Zenith, consultant sa PEPC, mopirma sila og memorandum of understanding tali sa DOE alang sa switching program diin ang upat ka butane canister ilisan og usa ka stainless steel gas cylinder.
“Kay we wanted to recover kining mga butane canisters sa merkado. Ang ilang ma-switch i-turnover sa DOE for destruction, so, gub-on jud to siya,” pasabot ni Zenith dihang nahinabi sa mga tigbalita niadtong Sabado.
Ang PEPC molusad sa ilang bag-ong produkto, ang stainless steel nga gas cylinder, karong Septiyembre 19, 2018, atol sa general assembly sa Cebu Federation of Beat Journalists (CFBJ) sa City Sports Club sa siyudad sa Sugbo.
Gibutyag ni Rene Isabelo Ursal, board secretary sa PEPC, nga ginama sa Vietnam ang stainless steel cylinders ug ang Phoenix Petroleum Philippines maoy mo-refill sa canisters ug ang kooperatiba maoy mobaligya.
Sigon ni John Velasco, vice chairman sa PEPC, target nila makaabot og 1.5 milyones kabuok cylinders ang ilang mabaligya diin prayoridad nila nga baligyaan ang Sugbo.
Apan sa kasamtangan, 70,000 pa kabuok mga cylinders ang pasiunang mabaligya sa PEPC ngadto sa ilang awtorisadong distributors ug retailers.
Sumala ni Zenith moabot sa tres milyones ang konsumidor sa butane sa Sugbo pa lang.
Gipasabot ni Velasco nga maong daghan ang nigamit sa illegal nga butane gumikan kay nagnihit ang mga kahoy ug uling, nagmahal ang presyo sa LPG ug sa kagaan usab sa butane.
Gidugang niya maoy nabutang sa peligro o mahinungdan sa sunog ang mga butane canisters tungod kay gisudlan kini og LPG bisan kon gubaon na ang sudlanan o nalumping na.
“Ang ilahang focus man gud ana is not for your safety but more on their profitability. So, ingon ko di na maayo kay og mao na man gani na, di na negosyo kuan na siya temporarily lang unya moingon sila nga wa man sila gi-regulate,” dugang ni Velasco.
Dugay nakalusad ang PEPC sa maong produkto tungod kay gihuman pa nila ang gikinahanglan nga mga permit sa DOE, Department of Trade and Industry, ug Department of Environment and Natural Resources tulo ka tuig na ang nakalabay.