DILI DIAY ECSTACY

TAMBAL SA HIGH BLOOD NAKITA SA CPDRC

■ LOSARTAN TABLETS: Mao kini ang tambal nga Losartan tablets alang sa high blood pressure nga unang gidudahan nga party drugs o ecstacy nga nakita atol sa greyhound operation sa Cebu Detention and Rehabilitation Center (CPDRC) sa miaging semana, besperas sa piyesta sa patron sa pasilidad.

Mga tabletas nga nakuha sa sulod sa mga selda sa Cebu Provincial Detention and Rehabilitation Center (CPDRC) atol sa greyhound operaton sa miaging semana dili ilegal, apan tambal sa hypertension o alta presyon ug uban pang sakit.

Mao kini ang pamahayag sa Philippine Drug Enforcement Agency 7 kagahapon human sa ilang pagsusi sa maong mga tambal.

Matod ni Atty. Wardley Getalla, direktor sa PDEA-7, ang mga tabletas nga unang gidudahang party drugs o ecstacy tablets namatud-an nga mga tambal mapalit over-thecounter.

Apan giangkon niini nga makaduda ang mga de kolores nga tabletas sanglit susama kinig porma sa mga kontrabando nga ilang masakmit sa mga balay-kahilayan nga adunay mamaligya sa party drugs.

“Sa ecstacy na ating ti-nest na mga tablets no, negative siya sa any kind of regulated or dangerous drugs, so di na natin inadentify kung anong klaseng drugs ito pero itoy pwede ma order over the counter na drugs,” matod ni Getalla.

Bisan pa niini, magpadayon ang ilang monitoring sa mga bilanggoan sa Central Visayas sa pagtuo nga adunay mga illegal nga drugas nga gipalusot sa mga durugista.

Si Chief Supt. Debold Sinas, direktor sa Police Regional Office (PRO) 7, nihangop sa mong kalamboan gikan sa PDEA 7.

Una nang nagpatabang ang jail warder sa CPDRC nga si Reynaldo Valmoria sa kapulisan aron mapuhag ang pagsulod sa mga ilegal nga butang nga maoy hinungdan nga gilusad ang maong greyhoud operation.

Gisaad ni Sinas nga ang PRO 7 nga ilang abagan ang CPDRC sa pagbantay sa mosulod ug aduna na silay nasabotan nga himuon aron dili na makasulod ang ilegal nga drugas pinaagi sa pagpatuman sa joint intel cerberus kun hugot nga pagpatuman sa ganghaan sa bilangoan nga gitawag niya nga Guardian of Hell.

“We have already close coordination in fact we have launched katong amoang joint intel project Cerberus, kabalo mo unsa ang Cerberus? Katong Guardians of Hell,” matod ni Debold Sinas.

Gibutyag ni Valmoria nga nakadawat siya og taho gikan sa mga tigpaniid nga adunay ipalusot sa CPDRC nga mga kontrabando hinungdan nga nagpatabang sa PNP nga molusad sa operasyon. /