Filing sa COC gikatakda sa Oktubre 1-5
Gitakda sa Commission on Elections (Comelec) karong Oktubre 1 hangtod sa 5 ang pagduso sa certificate of candidacy (COC) sa mga magpapili alang sa piniliay sa Mayo 2019.
Sa Resolution No. 10420 nga gipagawas niadtong Biyernes, ang Comelec nitakda usab sa Septiyembre 28 alang sa mga partido nga moduso og listahan sa awtorisadong signatories ug specimen signature sa certificate of nomination and acceptance (Cona) ngadto sa Law Department sa komisyon.
Matod ni Cebu Provincial Election Supervisor Atty. Lionel Marco Castillano kon ang nipirma sa Cona kay dili awtorisado sa partido, dili balido ang Cona ug makonsiderar nga independent ang kandidato nga niduso niini.
Apil sa mga rekisitos nga kinahanglan isumitir sa mga mokandidto ang lima ka kopya sa COC nga orihinal nga gipirmahan sa mokandidato, ginotaryo, orihinal nga thumb print, passport size nga identification card, documentary stamp nga P30, lima ka kopya sa Cona.
Kon dili kumpleto ang mga rekisitos, dili kini dawaton sa Comelec. Sigon ni Castillano kinahanglan ang mokandidato ang personal nga moduso sa iyang COC kon dili siya makahimo niini, kinahanglan naka-attach ang authority to file nga ginotaryo usab.
Ang COC ug Cona mahimo nga ma-download sa website sa Comelec.
Ang mga magpapili sa pagka gobernador, bise gobernador, provincial board members ug mga kongresista sa lalawigan gawas lang sa highly urbanized cities sa Sugbo ug Lapu-Lapu, anha mosangat sa ilang COC sa provincial nga buhatan sa Comelec sa ikaduhang andana sa Legislative Building sa Kapitolyo.
Samtang, ang Comelec Cebu City North District ubos sa pagpangulo ni Atty. Marchel Sarno ang gitahasan nga modawat sa mga COC sa mga mokandidato sa siyudad sa Sugbo.
Ang ubang mga magpapili sa lalawigan adto moduso sa ilang COC sa lokal nga mga buhatan sa ilang lugar.
Ang mga buhatan sa Comelec bukas gikan sa alas 8 sa buntag hangtod sa alas 5 sa hapon ug wala nay tungang gabii og ekstensyon sa filing human sa Oktubre 5.
“Lisod ni siya i-extend kay naa man gud mi giapas nga printing sa ballots,” dugang ni Castillano.
Sa samang resolution, ang gusto nga mo-withdraw sa ilang COC ug ilisan og laing kandidato kinahanglan mobuhat niini sa Nobiyembre 29 mo-reflect sa balota ang ilang ngalan.
Kon mo-withdraw o mamatay ang magpapili human sa maong petsa kinahanglan ang mo-substitute kay susama niini og apelyido.
Si Castillano naglaom nga moabot na og 3 milyones ang botante sa tibuok Sugbo sa midterm elections sa 2019 kay kuwang na lang og 100 mil ug ang pagpangrehistro nagpadayon hangtod sa Septiyembre 29, 2018.