DIHANG MIUWAN ANG MGA GRASYA

Sa tanang mga panghitabo sa kalibotan ug kinabuhi adunay katuyoan ang Kahitas-an.

Si Roy Adorna-Gilbuela, 34, lumad nga taga isla sa Bantayan ug kamaguwangan sa pito ka managsuon, nakasinati niini.

Ingon sa sinugdan, duna siyay gipangita sa kinabuhi nga giubanan usab og mga kalisdanan.

Gusto ni Roy nga mahimong civil engineer o architect sanglit gusto niya ang kalibutan sa construction, apan gibalibaran siya sa iyang iyaan ug uyoan kinsa mao unta ang mogasto sa iyang pagtungha sa kolehiyo.

Inay gitanyagan siya nga paeskwelahon sa kursong electrical engineering.

Apan lagi kay aduna siyay phobia human siya nakuryentihan kaniadto, wala niya kini.

Nisulod siya sa seminaryo para lang maka-eskwela sa college bisan kon layo ra sa iyang hunahuna ang pagkapari.

Nitungha si Roy sa high school sa Bantayan Southern Institute sa first ngadto sa third year.

Apan nianang fourth year, nibalhin siya sa Madridejos National High School tungod kay di na makaya sa iyang mga ginikanan ang pagpatungha kaniya sa pribado.

Kini human masakit ang iyang amahan, kinsa usa ka

master cutter sa mga pukot, apan na-paralyzed dihang siya second year high school pa.

Nitrabaho si Gilbuela sa iyang iyaan ug uyoan aron aduna siyay mabawon sa eskwelahan ug aron hatagan og bugas ang iyang pamilya. Hangtod nga nagpa-boy siya sa manukan (manok igtatari) sa iyang uyoan ug gihatagan siya og P1,000.

SEMINARISTA

Nakurat si Roy dihang nananghid siya sa iyang amahan kay nagtuo siyang pugngan, apan gibaligya na hinuon ang ilang baka aron ipamalit sa iyang gamit mga para sa seminaryo aron naa siyay mabawon.

Pag-abot niya sa second year sa kursong Philosophy, ang iyang papa namatay (2004) mao nga gusto na niyang mogawas aron atimanon ang iyang pamilya.

Apan wa siya tugoti, inay ang seminaryo nihatag og suporta sa iyang pamilya.

Nipadayon si Roy sa pag-eskwela hangtod nahuman ang 4th year sa Philo ug didto hingpit na siyang nanamilit sa iyang spiritual director sa seminaryo.

“I was still in doubt. Bisan pa og giunsa nimo og push ang imong kaugalingon nga magpari, if dili gyud na ang gihatag sa Ginoo para sa imoha, tabla ra nga gipakasal ka sa babaye nga dili nimo gusto. But I really wanted to,” matod ni Roy.

Upat ka buwan sa iyang pagbiya sa seminaryo, iyang nahimamat si Joan nga karon maoy iyang naasawa.

Ilang gipaabot nga manganak sila sa ilang first baby (girl) sa mosunod nga mga semana.

TRABAHO NGA NASUDLAN

Human sa kapin sa tunga sa tuig gikan sa iyang pagbiya sa seminaryo, nitrabaho si Roy sa Greenwich pizza sa Ayala isip tighugas sa plato ug ubang bulohaton.

Iyang gihagit ang iyang kaugalingon nga kon mamatay man, mobiya siya sa kalibutan nga adunahan. Nag-sideline sab siya og piano teaching sulod sa unom ka buwan hangtod nahimo siyang supervisor.

Nibalhin siya og trabaho sa Dedon, kansang agency nilambo gikan sa kapin 100 ka personnel, nahimong 600 human sa duha ka tuig.

Nibiya na usab siya ug iyang gitudloan ang iyang kaugalingon nga di mangimpleyo.

Sa 2009 nagnegusyo siya og isda gikan sa Isla de Gato sa Daanbantayan, iyang dad-on sa Pasil (Cebu City) diin usa ka higayon niana diriyot siya mamatay.

Human sa kapin tulo ka buwan, nisulod siya og networking, apan di madawat sa iyang konsiyensya nga mamaligya og produkto nga mahal kaayo aron lang siya maka-kwarta.

Nibiya na usab siya human sa unom ka buwan.

PAG-ABOT SA SWERTE

Niadtong October 2009, nisugot na siyang mag-agent ug namaligya og balay ug yuta.

Tulo lang ka semana human siya nitutok sa real estate business, nakabaligya siya og unom ka balay balor og dul-an P800,000 matag usa ug laing P6 milyones paglabay sa lima ka adlaw.

Apan sa wa pa siya nakahalin, niagi una siya og hangyo sa iyang landlady kaniadto nga lugwayan ang iyang pagpuyo sanglit wa pa pa siyay ika-abang sa boarding house.

Gani namaligya pa siya og siomai para adunay ika-pamilete.

Nadtong 2013, iyang natukod ang Bachelors Realty and Brokerage Inc., nga akreditado sa tanang land developer sa Pilipinas.

Aduna siyay kapin 8,000 ka mga ahente ug broker.

Sa pagkakaron, aduna na siyay 14 ka branches nga nahimutang sa Cebu City (main), LapuLapu City, Bohol, Dumaguete, Ormoc City, Bacolod, Cagayan de Oro, Davao ug Digos City, Pagadian City, Imus Cavite, Indang, Cavite ug Pampanga.

Gikan sa hapit way makaon, way kuryente ang balay kaniadto, iyang giantos ang tananng sakripisyo uban sa pagdawat sa abuloy sa seminaryo, karon siya na ang nagtabang sa mga nanginahanglan. /

/ TAMPO ■ MAOY BOSS: Kaniadto, si Roy Ardona-Gilbuela nanrabaho ra. Apan karon, siya na ang boss sa kompniya sa realty nga iyang gitukod. Ang kanhi seminarista wa magdahom nga mahimo siyang negusyante.

/ TAMPO ■ PASPAS: Niadto lang Oktubre 2009 nagsugod isip agent sa real estate si Roy Ardona-Gilbuela (wala). Apan wa pa gani 10 ka mga tuig, midako na og maayo ang iyang negusyo sa real estate ug dunay mga 8,000 ka personnel. Duna siyay mga buhatan di lang sa Kabisay-an, apil na sa Luzon ug Mindanao. Malipayon na siya sa ilang pagpuyo ni Joan (tuo). Nagpaabot sila karon sa pagkahimugso sa ilang unang baby.