Isyo sa rally
Duha ka grupo ang nagpahigayon og thanksgiving mass ug rally niadtong Domingo atol sa ika-140 ka tuig nga adlaw’ng natawhan sa Great Old man, Don Sergio Osmena Sr. Ang maong managlahi nga kalihukan gipasi-ugdahan sa Bando Osmena Pundok Kauswagan (BOPK) ug sa oposisyon, Barug Team Rama o Barug PDP-Laban. Gawas sa thanksgiving mass, ang sa BOPK nga rally, gitumong usab sa pagkondinar sa mga nahitabong pagpamatay dinhi sa dakbayan labi pa ang binuhatan sa kapulisan. Samtang ang sa Barug, pagsuporta usab sa kapulisan sa kampaniya niini batok sa kriminalidad ug pagsuporta sa administrasyong Duterte sa pagpakigbatok sa illegal nga drugas.
Sa duha ka mga grupo, kinsa man kaha nga misa o pangadyi ang gipaminaw sa Ginoo? Puro man kaha to misa pasalamat. Unya kinsa man ang mas daghan nanambong? Matod pa sa bana-bana sa kapulisan, mokabat sa 45 mil ang mitambong sa grupo sa Barug sa Plaza Independencia samtang 2,500 ra sa BOPK nga gipahigayon sa Plaza Sugbo atubangan sa City Hall.
Apan matod pa sa atong tinubdan nga nanghakot ang isig ka grupo. Ang BOPK nangayo og quota o delegasyon sa ilang mga kaalyado’ng mga barangay kapitan. Mao usab ang gihimo sa taga Barug. Kinsa may ganahan mo-attend anang rally og dili hakuton, pakan-on ug bayaran. Labi pa kay naguwan-uwan atong adlawa.
Didto sila si PRO 7 chief Debold Sinas ug Cebu City Police Office (CCPO) Director Royina Garma mitambong sa habig sa Barug. Basin ma-kuwestiyon na pod sila sa ilang pagtambong gumikan kay mahulog man kadto nga pulitikanhong kalihukan. Dili ba non-partisan man ang kapulisan? Didto usab ang mga police trainees.
Mitambong usab si kanhi mayor Mike Rama. Dili ba salikwaot sa habig ni Mike nga mitambong sa maong kalihukan nga anti-drug rally unya usa siya sa gihinganlan sa Presidente mga “drug protector.” Hinoon, wala mosaka sa stage si Mike ug milakaw dayon. Ang nakanindot kay ang igsoon sa “kanhi laos nga pulitiko” nga si Georgia Osmena,” didto mitambong sa rally sa Barug. Unya ang iyang igsoon nagpasi-ugda og rally usab.
(bobbygnalzaro@gmail.com)