Nibiyag sayo si Rama?

Nahibulong gyud ko nganong nibiya og sayo si kanhi mayor Mike Rama sa dakong kalihokan sa Barug Team Rama diha sa Plaza Independencia sa miaging Dominggo.

Nisaad man gud ko sa miaging lindog nga molili sa kalihokan sa oposisyon sa Syudad sa Sugbo.

Apan dihang mosulod na ko sa gate sa Plaza Independencia, atong nakit-an si Rama nga nigawas ug nilabang.

Paspas kining naglakaw kuyog sa pipila ka mga tigsuporta palayo. Dihang nipadayon ko pagsulod, akong nadungog si Bise Mayor Ed Labella nga nagdiskurso.

Unsa may nahitabo diay?

Nganong nibiya man si Rama sa kalihokan nga sa niguwa sa balita, siya man ang nitumaw nga lider sa maong kalihokan?

Wa ko makahibawo kon nisaka ba siya sa stage ug namulong sa wala pa ko maabot. Apan makapahibong gyud kanako nganong nibiya kini samtang nagdiskurso si Labella.

TURNOUT

Nakakita man gyud ko sa kalihokan diha sa Plaza Independencia ug sa Plaza Rizal. Kon ako ang pangutan-on, makaingon ko nga mas daghan ang naa sa atubangan sa City Hall.

Ngano? Di man gud huot ang kalihokan sa Plaza Independencia.

Sweto ko kon unsa kahuot sa plaza kon ang mga tawo moabot og 45,000 ngadto sa 50,000.

Mao kini ang estimate kadtong panahon sa Sinulog.

Daghan man tuod ang nanambong apan di maklaro kon asa ang mga taga Syudad sa Sugbo ug ang mga tigsuporta ni Presidente Rodrigo Duterte nga taga Mandaue ug ubang dapit gawas sa lalawigan.

Kahibudngan sab ang pag-usab sa estimate ni Cebu City Police Chief Royina Garma gikan sa 6 mil ug 1,000 ka pulis ngadto sa 45 mil.

Nakahibawo si Garma nga kon tarungon sa pag-estimate ang kadaghanon sa tawo, iphon ra ang pilay masulod sa one square-meter kun usa ka metro-kwadrado. Kon upat ngadto sa lima ang masulod, makaingon ta nga moabot sa kapin sa 40 mil kon ingon niini ang kabag-on sud sa 1,000 metro kwadrado.

Apan sa kalihokan sa Plaza Independencia, baga lang ang mga tawo atubangan sa stage.

Buot ipasabot, di gyud katuohan ang estimate nga 45,000.

Ang nakaalkansi sa kampo ni Mayor Tomas Osmeña kay ang tamdan sa mga estimate mao ang kapulisan nga tua dapig sa kalihokan sa plaza

Bisan pa man, atong nabantayan nga duha ka kalihokan nagpadayag og mensahe alang sa panaghiusa.

Ambot kon mahitabo pa ba kaha kining panaghiusa nga nagsugod na man ang political season karong Oktubre.